Sýdaǵy jáne órt qaýipsizdigin, sol sıaqty qoǵamdyq tártipti qamtamasyz etý úshin bıylǵy shomylý maýsymynda Alakól jaǵalaýyna Tótenshe jaǵdaılar departamenti qutqarý bólimsheleriniń qutqarýshylary, Kóliktik baqylaý  ınspeksıasynyń mamandary, Polısıa departamentiniń qyzmetkerleri jumyldyrylǵan, dep habarlaıdy bairaqmedia.kz

Qaýipsizdik pen qoǵamdyq tártipti qadaǵalaýda  drondardyń jáne beınekameralardyń múmkindigi keńinen paıdalanylady, - dep málimdedi Jetisý oblysy ákiminiń baspasóz qyzmeti.

Tyıym salynǵan jerlerde sý kólikteriniń baqylaýsyz qozǵalysy máselesin retteý maqsatynda Jetisý oblysynda Sýdy ortaq paıdalaný erejesi bekitilgen bolatyn. Erejelerdiń saqtalýyn kóliktik baqylaý ınspeksıasy júrgizedi, bul rette ınspektorlar sany ulǵaıtyldy, 3 sý kólik turaǵy jáne quqyq buzýshylarǵa arnalǵan arnaıy 1 aıyppul turaǵy qarastyrylǵan.

Oblys ákimdigimen birlesip qabyldaǵan jáne jergilikti máslıhatpen bekitilgen Sýdy paıdalaný erejesinde sýda júzý quraldaryn paıdalaný talaptary naqty kórsetilgen. Bul talaptardyń saqtalýyn baqylaıtyn ınspektorlar sany jazǵy shomylý maýsymynda arttyryldy. Kólik mınıstrliginiń qoldaýymen 4-7 shilde aralyǵynda Almaty qalasynan Aqshı jaǵalaýynda qyzmet etýge qosymsha qyzmetkerler keledi. Maýsym bastalǵaly sýda júzý kólikteri tarapynan 23 quqyq buzýshylyq tirkelip, ákimshilik aıyppul salyndy. 12 shaǵyn ólshemdi keme aıyppul turaǵyna qoıyldy. Basty maqsatymyz – jazalaý emes, demalýshylardyń qaýipsizdigin qamtamasyz etýde erejelerdiń saqtalýyn qamtamasyz etý, - deıdi Jetisý oblysy boıynsha kóliktik baqylaý ınspeksıasynyń basshysy Dastan Jumaqulov.

Bıylǵy 5 maýsymnan bastap Alakól aýdany Aqshı jáne Kóktuma aýyldaryndaǵy kól jaǵalaýlarynda qoǵamdyq tártipti qamtamasyz etýge polısıa qyzmetkerleri jumyldyrylǵan. Budan bólek jol patrýlinde arnaıy avtoekıpajdar qyzmet etedi.

Osy jyldyń 15 shildesine deıin oblys ákimdigi tarapynan tirek pýnktine qosylǵan 44 kamera Aqshı aýylyna, 9 kamera Kóktuma aýylyna ornatylady dep josparlanǵan. Sonymen birge jaǵalaýda drondyq patrúldeý júrgiziledi. Dron arqyly anyqtalǵan quqyq buzýshylyqtar dereý ýchaskelik ınspektorǵa berilip, ákimshilik shara qoldanylady. Máselen, osy jyly jol erejesin buzýdy qospaǵanda, 28 adamǵa qoǵamdyq orynda ishimdik ishý, zańsyz saýda-sattyq, tazalyqqa nusan keltirý faktileri boıynsha shara qoldanylǵan. Degenmen ótken jyldyń osy kezeńimen salystyrǵanda tártip buzýshylyq azaıǵany baıqaldy. Oǵan zamanaýı qurylǵylardy tıimdi paıdalaný óziniń oń áserin tıgizip otyr, - deıdi  Jetisý oblysy Polısıa departamenti bastyǵynyń orynbasary, polısıa polkovnıgi Jasulan Baıkenov.

Osy rette Polısıa qyzmetinde osyndaı 4 dron bolsa, Tótenshe jaǵdaılar departamentiniń Jedel qutqarý tobynda demalýshylardyń qaýipsizdigin qadaǵalaıtyn 2 dron qoldanysta. Atalmysh ushý qurylǵysy qaýiptilik belgisine jaqyn jerde nemese qaýipti jerlerde shomylyp júrgen demalýshylardy anyqtap, olarǵa dron arqyly eskertilip, qaýiptiń aldy alynady. Ushý qurylǵysynyń budan basqa da profılaktıkalyq sharalarǵa tıgizer kómegi zor. Jalpy qutqarý bólimshesiniń qyzmetkerleri sýǵa shomylýǵa qaýipti jerlerde belgiler ornatyp, kún saıyn demalýshylar arasynda túsindirý jumystaryn júrgizedi, jadynamalar taratady.

Sol sıaqty Aqshı aýylynda dárigerlik ambýlatorıa, dárihana jáne táýlik boıy Jedel járdem jumys isteıdi. Oblys ortalyǵynan hırýrgtar, kardıologtar, travmatologtar jáne basqa da mamandar belgilengen kestege sáıkes issaparǵa jiberiledi.

Sondaı-aq jaǵalaýdyń sanıtarlyq ınfraqurylymyn jaqsartý úshin birqatar sharalar qabyldandy. Búginge deıin 22 sanıtarlyq-gıgıenalyq torap qoıylǵan. Jalpy sany 180 qoqys konteıneri ornatyldy.