Memleket basshysy Pákistan Qarýly Kúshteri Qurlyq áskerleriniń bas qolbasshysy general Asım Mýnırdi qabyldady, dep habarlaıdy Bairaqmedia.kz.

Kezdesýde qorǵanys jáne áskerı bilim berý salasyndaǵy yntymaqtastyq, sondaı-aq eki el arasyndaǵy baılanystardy damytý máseleleri talqylandy.

Prezıdent Qazaqstannyń Pákistandy Ońtústik Azıadaǵy mańyzdy seriktesi retinde qarastyratynyn atap ótti. Sonymen qatar ekijaqty qarym-qatynastardyń oń qarqynmen damyp kele jatqanyna toqtaldy. 

Qasym-Jomart Toqaevtyń aıtýynsha, eki eldiń ekonomıkalyq, sonyń ishinde saýda, kólik jáne logıstıka salalaryndaǵy baılanystaryn odan ári ilgeriletýge aıtarlyqtaı áleýeti bar.

Asım Mýnır Memleket basshysyna Pákistannyń Premer-mınıstri Shahbaz Sharıftiń yqylasyn jetkizdi. Qurlyq áskerleriniń bas qolbasshysy Qazaqstan men Pákistannyń qorǵanys vedomstvolary arasyndaǵy yqpaldastyqty joǵary baǵalady. 

Áńgimelesý barysynda ekijaqty yntymaqtastyqty órkendetýge tyń serpin berýdiń, ekonomıkanyń túrli sektoryndaǵy ózara múddege saı keletin múmkindikterdi tolyq júzege asyrýdyń mańyzyna nazar aýdaryldy.