Otandyq kınoındýstrıaǵa olja salǵan týyndyny belgili kaskader, rejıser ári akter Ǵalymbek Qaratúrik túsirgen, dep habarlaıdy bairaqmedia.kz aqshamnews.kz-ke silteme jasap

Shyǵys Evropadaǵy eń tanymal baıqaýda 200-den astam shyǵarma baq synaǵan. Úsh aıdan astam irikteý júrgizilgen festıválde “Tutylǵan jaryq” eń úzdik qysqa metrajdy fılm dep tanyldy. Týyndynyń rejıseri Ǵalymbek Qaratúriktiń aıtýynsha,  senarıi shynaıy oqıǵaǵa negizdelgen.

Fılmde bas keıipkerdi kaskader Edil Symaǵulov oınasa, qosalqy rólderdi kásibı akterler somdaǵan.

Týyndy kúndiz kózi kórmeıtin, túnde ǵana kóretin barymtashynyń balasy týraly. Onyń uly da týra ózi sıaqty bolyp dúnıege kelip, ákesiniń jolyn qýady. Kózi de túnde ǵana kóredi. Aqyrynda ákesimen birge opat bolady. Kózdiń bul aýrýy ǵylymda «ahromatopsıa» dep atalady. Coǵan baılanysty fılmniń ataýy “Tutylǵan jaryq” dep qoıylǵan.

«Bul fılmniń negizgi aıtar oıy ne jasasań – sol aldyńnan shyǵady. Bul dúnıede jaqsylyq jasaǵan adamnyń ómiriniń sońy jaqsylyqpen, jamandyq jasaǵan adamnyń ómiriniń sońy jamandyqpen aıaqtalatyny kórsetiledi.Tabıǵat qubylystarymen baılanysty da halyqtyq fılosofıalyq detaldar kórinis tabady. Mysal úshin kúnniń tutylýy, jalǵyz qustyń jaryqqa qaraı ushyp bara jatýy degen sıaqty kórinister bar»,-deıdi Ǵalymbek Qaratúrik.

  Sondaı-aq ol Qazaq kınoındýstrıasy úshin birneshe irgeli jobalardy qolǵa alyp jatqanyn, jaqynda jarıalaıtynyn da aıtty.