Jetisý oblysynyń Kóksý aýdanynda krımınaldyq polısıa qyzmetkerleri mal urlyǵyna qatysy bar birneshe derekti anyqtap, qylmyskerlerdiń jolyn kesti, dep habarlaıdy Bairaqmedia.kz.

Oblystyq polısıa departamentiniń málimetinshe, 7 maýsymda Muqanshy aýyldyq okrýginiń jaıylymynan belgisiz bireýler 9 bas iri qarany qoldy etken. Jábirlenýshige keltirilgen materıaldyq shyǵyn kólemi 2,5 mıllıon teńge bolǵan. Arada birneshe kún ótken soń, sol óńirdegi Alǵabas aýyldyq okrýgi aýmaǵynda taǵy bir derek tirkeldi. Bul joly qaskóıler 14 bas iri qarany aıdap áketip, sharýashylyq ıesine 7 mıllıon teńgeden astam shyǵyn keltirgen.

Atalǵan derekter boıynsha Kóksý aýdandyq polısıa bóliminiń jáne oblystyq Krımınaldyq polısıa basqarmasynyń qyzmetkerleri jedel-izdestirý is-sharalaryn júrgizip, nátıjesinde 51 jáne 37 jastaǵy eki kúdikti qolǵa tústi. Ekeýi de Kóksý aýdanynyń jergilikti turǵyndary bolyp shyqty, – delingen habarlamada.

Operasıa barysynda MAN júk kóligi toqtatylyp, kólik ishinde urlanǵan maldyń satyp alýshysy retinde Almaty oblysynyń turǵyny ustaldy. Tekserý kezinde júk bóliginen jábirlenýshilerge tıesili 14 bas iri qara mal tabylyp, tárkilendi.

Qazir atalǵan derekter boıynsha Qazaqstan Respýblıkasy Qylmystyq kodeksiniń mal urlyǵyna qatysty baby boıynsha qylmystyq is qozǵaldy. Zań boıynsha mundaı qylmys úshin úsh jyldan jeti jylǵa deıingi merzimge bas bostandyǵynan aıyrý jáne múlkin tárkileý túrindegi jaza qarastyrylǵan.

Quqyq qorǵaý organdary tergeý sharalaryn jalǵastyryp, ustalǵan azamattardyń ózge de mal urlyǵyna qatysy bar-joǵyn muqıat tekserip jatyr.