Irannyń atom energıasy agenttigi AQSH-tyń úsh negizgi ıadrolyq nysanǵa jasaǵan shabýylyn «qatygez shabýyl» dep atady, dep habarlaıdy bairaqmedia.kz

Biraq, soqqydan keıin de ıadrolyq ónerkásipten bas tartpaıtynyn málimdedi. Bul týraly Irannyń memlekettik IRNA aqparat agenttigi habarlady. 

Agenttik habarlaýynsha, «zańsyz áreketter» ulttyq ónerkásiptiń damýyn toqtatpaıdy.

Ári agenttik AQSH prezıdenti Donald Tramp Aq úıdegi málimdemesinde aıtqan Fordo, Natanz jáne Isfahandaǵy nysandardyń «tolyq joıylǵanyn» rastaǵan joq.

IRNA Irannyń ıadrolyq qaýipsizdik basqarmasy soqqylardan keıin osy úsh ıadrolyq nysanda radıasıalyq lastanýdyń belgilerin anyqtamaǵanyn habarlaǵan. Basqarma sondaı-aq nysan mańynda turatyn azamattarǵa qaýip joq ekenin málimdegen.

Aıta keteıik, buǵan deıin Tramp AQSH áýe soqqylary Irannyń úsh negizgi ıadrolyq nysanyn tolyq joıǵanyn málimdegen edi. Sondaı-aq, Tegeran Izraılmen beıbit kelisimge kelmese, áskerı is-qımyldardy jalǵastyratyny týraly aıtqan bolatyn.