Májilis depýtaty Maqsat Tolyqbaev premer-mınıstrdiń orynbasary Ermek Kósherbaevqa jáne İshki ister mınıstri Erjan Sadenovke qoǵamdyq qaýipsizdik máselesi boıynsha depýtattyq saýal joldady, dep habarlaıdy Bairaqmedia.kz.
Dabyl qaqpasqa amal joq. Ótkeni, aqparat maıdanynda jeńilip jatyrmyz. Aqparattyq gıgıena joqtyń qasy. Áleýmettik jelini ashsań, birin-biri balaǵattaǵan, jalǵan qaýeset taratyp, qan-maıdan bolyp jatqanyn kórip otyrǵan shyǵarsyzdar. Bir ǵana mysal, messendjerlerde «tutastaı derbestigimizge qaýip tóndi», «referendým ótedi» degen mazmundaǵy jalǵan aqparat, feıktiń óris alǵany sonshalyqty, túrli provokasıalyq vıdeolar órip júr. Bul jerde zań dıktatýrasy naqty jumys isteýi qajet. Quqyq qorǵaý, qaýipsizdik organdary qaıda qarap otyr? Salalyq mınıstrlikterdiń mindeti – der kezinde qaýesetti joqqa shyǵaryp, kúmándi saıttar men akkaýnttardy qadaǵalaý emes pe? Júrgizilip jatqan jumystar – óte álsiz, – dedi depýtat.
Ol memleketten mıllıardtar alyp otyrǵan memlekettik medıa quraldardyń ózi medıa etıkadan jurdaı ekenin alǵa tartty.
Kózge ilinetin aqparattyń 90 paıyzy ósek-dolbar ǵana. Keıbir jýrnalıs-blogerlerdiń kásibıligine qarnyń ashady, eldegi ósek-aıańnyń jeteginde júr. Resmı aqparat joq degen jalǵan aqparat taratýǵa ruqsat degen sóz emes. Kúdiktini sot qylmysker dep tappaıynsha syrttan úkim kesip, derbes derekterin, sýretterin jarıalaı salý, manıpýlásıa, aqparatty teksermeı jarıalap jiberý qazir óte beleń alyp bara jatyr, – dedi Maqsat Tolyqbaı.
