AQSH-tyń Tehas shtatynda bolǵan joıqyn sý tasqynynan qaza tapqandar sany 43 adamǵa jetti, onyń ishinde 15 bala bar. Jergilikti bılik ókilderiniń málimdeýinshe, taǵy da ondaǵan adam izdestirilip jatyr, dep habarlaıdy bairaqmedia.kz.
Oqıǵa ortalyq Tehastaǵy Gýadalýpe ózeniniń mańynda boldy. Birneshe saǵat ishinde 38 sm-ge deıin jaýǵan jaýyn saldarynan ózen 9 metrge kóterilip, alapat apat saldaryna ulasqan.
Kerr okrýginde ǵana 27 adam iz-túzsiz joǵaldy. Olardyń ishinde "Camp Mystic" jazǵy hrıstıan lageri ornalasqan, onda apat kezinde 700-ge jýyq adam bolǵan. Qazirgi málimet boıynsha, 27 adam tabylmaı jatyr.
Jalpy esepte 850 adam qutqarylǵan, keıbiri aǵashtarǵa jabysyp jan saqtaǵan. Sonyń ishinde 17 adamnyń aty-jóni áli naqtylanbaǵan. Qutqarý jumystary tikushaqtar men júzdegen eriktilerdiń kómegimen jalǵasyp jatyr.
Apattan eń kóp zardap shekken óńirler Kerr, Trevıs jáne Kendall okrýgteri. Trevıs okrýginde 4 adam kóz jumǵan, taǵy 13 adam habarsyz ketken. Kendall okrýginde de bir adam qaıtys bolǵany belgili boldy.
Tehas vıse-gýbernatory Den Patrıktyń aıtýynsha, sý tasqyny bastalǵanda óńirde Táýelsizdik kúnine arnalǵan merekelik sharalarǵa kóptegen týrıs kelgen. Adamdar shatyrlarda, treılerlerde jáne jalǵa alynǵan úılerde túnep jatqan.
Kerrvıll qalasynyń menedjeri Dalton Raıs:
“Biz naqty qansha adam joǵalǵanyn aıta almaımyz. Tek belgili bir tizim bar, biraq jaǵdaı óte kúrdeli,” – dedi.
Tabıǵı apat kezinde Heart O’ The Hills atty taǵy bir lagerdiń ıesi Djeın Regsdeıl de qaza tapqan.
Tasqynnyń kúshti bolǵany sonshalyq – bıiktigi 60 fýttan asatyn aǵashtar tamyrymen julynyp ketken. Jergilikti turǵyndardyń sózinshe, mundaı jaǵdaı buryn-sońdy bolmaǵan.
“Bul sumdyq. Qansha bala men adam iz-tússiz ketti. Bul apattan aman qalý óte qıyn edi,” – deıdi kýáger Tonıa Fýchchı.
Prezıdent Donald Tramp zardap shekkenderge kóńil aıtyp, federaldy kómek kórsetý úshin tótenshe jaǵdaı jarıalaýǵa daıyn ekenin jetkizdi.
Al, mamandar bul apattyń aldyn alýǵa bolar ma edi degen suraqqa “Ulttyq meteoqyzmette qysqartýlar bolǵan, sonyń saldarynan eskertý der kezinde berilmegen bolýy múmkin” degen pikir aıtty.
