Álem chempıonatynyń júldegeri, aýyr atlet Almas Óteshov ómirindegi túbegeıli ózgerister týraly ashyq málimdeme jasady, dep habarlaıdy Qaz365.kz.

Ol áleýmettik jelide ishimdikpen qoshtasyp, rýhanı jańǵyrý jolyna túskenin baıandap, bul jazbasyn jastarǵa oı salý úshin jarıalaǵanyn aıtty.

Bul sýretti jarıalamas buryn kóp oılandym. Shynymen de bunyń qajettiligi bar ma degen saýal janymdy mazalady. Biraq ózim úshin emes, ózgelerge sabaq bolsyn dep bólistim, – dep jazdy sportshy.

Almas Óteshov aýyr sátterde ishkilikke boı aldyrý – tyǵyryqtan shyǵatyn jol emes ekenin basa aıtady. Onyń aıtýynsha, jańa ómirge qadam basýy Quran atymen ishimdikten bas tartýǵa bergen ýádesinen bastalǵan.

Nurseıit Jylqyshybaıdyń «Ýaqyt kórsetedi» YouTube arnasyna bergen suhbatymda halyq aldynda Quran ustap turyp, endi eshqashan ashshy sýǵa jolamaımyn dep ant ettim, – deıdi Almas.

Ol bul kúreste Abaıdyń «Ózińe sen, ózińdi alyp shyǵar, aqylyń men qaıratyń eki jaqtap» degen ulaǵatty sózin basty baǵdar etkenin aıtyp ótti. Óteshovtiń aıtýynsha, ony qutqarǵan – aqyl men erik-jigerdiń kúshi.

Sondaı-aq sportshy óz jolynda qoldaý bildirgen jandarǵa erekshe alǵys aıtty. Atap aıtqanda, Qyzylorda oblysynyń ákimi Nurlybek Nálibaevqa, oblystyq sport basqarmasynyń basshysy Baqtıar Artaevqa, jáne Dáýlet Turlyhanov, Sadyq Mustafaev, Ilá Ilın syndy azamattarǵa sheksiz rızashylyǵyn bildirdi.

Alty aıdyń ishinde ómirim túbegeıli ózgerdi. Bul – meniń ekinshi tynysym, jańa ómirimniń bastaýy, – dep túıindedi sózin Almas Óteshov.