Jelide Jambyl oblysynda jasóspirimniń ańshylyq kezinde oqqa ushyp kóz jumǵany týraly aqparat tarady. Oblystyq polısıa departamenti sotqa deıingi tergep-tekserý bastalǵanyn málimdedi, dep habarlaıdy bairaqmedia.kz.

Telegram jelisindegi Halyqstan arnasynyń málimetinshe, Jambyl oblysynda jasóspirim oq tıip qaıtys boldy.

"Aldyn ala málimet boıynsha, 2012 jyly týǵan eki bala (synyptastar) túngi ańshylyqqa shyqqan. Jergilikti turǵyndardyń aıtýynsha, jasóspirimder qoıan aýlaýǵa shyqqan. Balalardyń biri qoıanǵa oq atyp, oljasyna qaraı júgirip ketken. Biraq áli de tiri qoıan qashýǵa tyrysqan. Ekinshi jasóspirim qoıandy toqtatamyn dep oq atqan, biraq oq dosyna tıgen", - delingen jazbada.

Jambyl oblystyq polısıa departamenti ókilderi NUR.KZ tilshisine abaısyzda adam ólimine ákep soqtyrǵan oqıǵa boıynsha sotqa deıingi tergep-tekserý bastalǵanyn habarlady.

Tártip saqshylary kúdiktini anyqtap, polısıa bólimshesine jetkizdi.

Qazirgi ýaqytta isti tolyq, obektıvti jáne jan-jaqty tergeýge baǵyttalǵan barlyq qajetti tergeý sharalary júrgizilýde.

"Sonymen qatar, kámeletke tolmaǵan balalaryn tárbıeleý jáne qadaǵalaý boıynsha óz mindetterin durys oryndamaǵan, sonyń saldarynan jasóspirimderdiń atys qarýyna qol jetkizip, túnde qaraýsyz qalǵany úshin ata-analardy jaýapkershilikke tartý máselesi qarastyrylýda", - dep atap ótti departamenttiń baspasóz qyzmeti ókilderi.