Nursultan Nazarbaevtyń baspasóz hatshysy Aıdos Úkibaı Qazaqstannyń tuńǵysh prezıdentiniń jubaıy Sara Nazarbaevaǵa qatysty taralyp jatqan aqparatqa túsinikteme berdi.
Ol sońǵy ýaqytta keıbir buqaralyq aqparat quraldarynda jáne áleýmettik jelilerde Sara Nazarbaevanyń densaýlyǵy men qazirgi jaǵdaıyna qatysty ártúrli boljamdar men shyndyqqa janaspaıtyn aqparattar taratylyp jatqanyn aıtty.
"Osyǵan oraı resmı túsinikteme berýdi jón dep sanaımyn: sáýir aıynan beri Sara Nazarbaeva Almaty qalasyndaǵy Prezıdent İs basqarmasynyń medısınalyq ortalyǵyna qarasty Ulttyq gospıtálde josparly em qabyldap keledi. Barlyq medısınalyq shara bekitilgen standarttarǵa saı, otandyq mamandardyń baqylaýymen júzege asyrylyp jatyr", - dep jazdy Úkibaı.
Ol BAQ ókilderi men áleýmettik jeli qoldanýshylaryn Sara Nazarbaevanyń esimin tekserilmegen aqparatpen baılanystyrmaýǵa, negizsiz paıymdar taratýǵa jol bermeýge shaqyrdy.
