Almatylyq "Han-Táńiri" fýtbol klýbynyń 19 jastaǵy shabýylshysy Dıas Tóleý qaıtys boldy, dep habarlaıdy
"Ekibastuz" klýbyna qarsy keshegi oıyn kezinde Dıastyń qalaı jaraqat alǵany kórinbeı qaldy. Biraq bas kezinde ol aıaǵyn ustap jatqan. Odan keıin jaǵdaıy múldem nasharlap ketti.
Efır kezinde ony zembilmen alyp ketkenin anyq kórýge bolady.
19 jastaǵy fýtbolshy keýdesin ustap jatqan. Artynan Qazaqstannyń fýtbol federasıasy Dıastyń qaıtys bolǵanyn habarlady.
"Qazaqstan fýtbol federasıasy "Han-Táńiri" klýbynyń shabýylshysy Dıas Tóleýdiń mezgilsiz dúnıeden ótkenin qaıǵyryp habarlaıdy. Jastyǵyna qaramastan, fýtbolǵa degen yntasy men talanty arqyly kózge túsken Dıastyń ómirden erte ketýi – orny tolmas qaza. Bul aýyr sátte onyń otbasynyń, jaqyndarynyń jáne komandasynyń qaıǵysyna ortaqtasamyz", - delingen resmı habarlamada.
Almaty qalalyq densaýlyq saqtaý basqarmasy usynǵan aqparatqa sáıkes, sol jerde bolǵan jedel járdem Dıas Tóleýdi ortalyq klınıkalyq aýrýhanaǵa jetkizgen.
Aýrahanaǵa túskende fýtbolshynyń tamyr soǵýy men arterıalyq qysymy bolmaǵan. Al kóz qarashyǵy úlkeıip ketken.
"Medısınalyq brıgada 30 mınýt boıy reanımasıalyq sharalar jasady. Alaıda ómir súrý belgilerin qalpyna keltirý múmkin bolmady. Bıologıalyq ólim tirkeldi", - deıdi dárigerler.
Marqumnyń denesi sot-medısınalyq saraptamaǵa jiberildi. Saraptama kezinde ólimniń sebebi anyqtalady.
