Londonǵa baǵyt alǵan Air India áýe kompanıasynyń Boeing 787-8 Dreamliner ushaǵy turǵyn aýdanǵa qulap, aýyr apatqa ushyrady. Bortta bolǵan 242 adamnyń bári kóz jumdy dep habarlanǵanymen, bir jolaýshynyń aman qalǵany belgili boldy, dep habarlaıdy bairaqmedia.kz. 

Jergilikti polısıanyń málimetinshe, ushaq qulaǵan úılerdiń turǵyndary arasynda da qurbandar bar.

Ushaqtyń apat sıgnalyn áýege kóterilgennen keıin birden jibergen. Bortta 12 ekıpaj múshesi jáne 230 jolaýshy bolǵan — olardyń 169-y Úndistan azamaty, 53-i Ulybrıtanıadan, 7-eýi Portýgalıadan jáne 1-i Kanadadan.

Hindustan Times basylymynyń jazýynsha, ushaqta bolǵan Ulybrıtanıa azamaty – 40 jastaǵy Ramesh Vıshvakýmar polısıa qyzmetkerleri qutqarǵan jalǵyz adam retinde tirkelip otyr. Ahmedabad polısıasy onyń apat ornynan tiri shyǵarylǵanyn rastady. Qazir ol aýrýhanada em qabyldap jatyr.

«Ushaq kókke kóterilgennen keıin 30 sekýnd ishinde qatty dybys shyqty. Sol sátte bári bir sátte ózgerdi – ushaq qulady. Barlyǵy kóz aldymda tez bolyp ketti. Esimdi jıǵan kezde aınalamda máıitter men ushaqtyń synyqtary jatty. Qatty qorqyp kettim, ornymnan turyp, júgire jóneldim. Bireý meni ustap alyp, jedel járdem kóligine otyrǵyzyp, aýrýhanaǵa jetkizdi», – dep eske alady aman qalǵan Ramesh Vıshvakýmar.

Qaza tapqan jolaýshylardyń arasynda burynǵy mınıstr de bolǵan bolýy múmkin. Úndistan úkimetiniń resmı ókilderiniń aıtýynsha, Gýdjarat shtatynyń burynǵy bas mınıstri Vıdjaı Rýpanı ushaq apatynda qaza tapqan bolýy yqtımal.

Qutqarý jumystary áli jalǵasyp jatyr. Tótenshe jaǵdaılar qyzmeti apat ornynda. Tergeý bastaldy.