Mánerlep syrǵanaýdan álem chempıonatynyń kúmis júldegeri Mıhaıl Shaıdorovtyń daıyndyq jaǵdaıyna qatysty málimdemesinen keıin Týrızm jáne sport mınıstrligi resmı túrde túsinikteme berdi, dep habarlaıdy bairaqmedia.kz.
Mınıstrlik otandyq jetekshi sportshynyń biri — Mıhaıl Shaıdorovtyń jarystarǵa daıyndalýǵa tıisti jaǵdaıdyń bolmaýyna qatysty jaǵdaıdan habardar. Bul jaǵdaı Memleket basshysynyń sport salasyndaǵy vertıkaldi basqarýdy qalpyna keltirý jónindegi tapsyrmasynyń oryndy ári der kezinde berilgenin taǵy bir márte dáleldeıdi. Atalǵan reformanyń negizgi baǵyttarynyń biri — joǵary jetistikter sportyna arnalǵan sport nysandaryn jergilikti atqarýshy organdardan Mınıstrlik qaramaǵyna berý. Mınıstrlik ulttyq quramany Olımpıadaǵa daıyndaý josparyn bekitti. Osy jospar aıasynda medal alýǵa úmitker sportshylardy anyqtady. Olardyń árqaısysyna, sonyń ishinde Mıhaıl Shaıdorovqa da, jaýapty qurylymdarǵa naqty mindetter júkteldi, – delingen habarlamada.
Josparǵa sáıkes jaýapty qurylymdardyń mindetteri belgilengen:
-
Sportty damytý dıreksıasy (SDD): Jeke daıyndyq josparlarynyń oryndalýyn baqylap, barlyq taraptardyń ózara is-qımylyn úılestiredi.
-
Sport federasıalary: Bilikti jattyqtyrýshylar quramyn, halyqaralyq jıyndar men jarys tájirıbesin qamtamasyz etedi.
-
Óńirlik ákimdikter: Sportshylarǵa turý, tamaqtaný jáne jattyǵý úshin qajetti bazalyq jaǵdaılar jasaıdy.
-
Sporttyq medısına jáne ońaltý ortalyǵy: Medısınalyq-bıologıalyq qoldaý men ońaltý sharalaryn qamtamasyz etedi.
-
Ǵylymı-ádistemelik súıemeldeý: Daıyndyq baǵdarlamalarynyń tıimdiligin baǵalap, usynystar beredi.
Budan bólek, sportshylardy daıyndaýǵa qatysy bar basqa da mekemeler jumysqa tartylǵan. Mınıstrlik árbir sportshyǵa, onyń ishinde Mıhaıl Shaıdorovqa da, turaqty túrde qajetti qoldaý kórsetiletinin atap ótti. Sportshynyń qaı jerde turatynyna nemese tirkelgen mekenjaıyna qaramastan, barlyq jaǵdaılar qarastyrylatyn bolady.
Aıta ketsek, buǵan deıin mánerlep syrǵanaýdan álem chempıonatynda kúmis medal jeńip alǵan Mıhaıl Shaıdorov BAQ-qa bergen suhbatynda AQSH, Japonıa jáne Ońtústik Koreıanyń jetekshi sportshylary sıaqty daıyndyq úshin jaǵdaıy joq ekenin aıtqan bolatyn.
