Almatyda áıelin pyshaqtap óltirgen polıseı buǵan deıin jumystan shyǵarylǵan. Bul týraly Almaty qalalyq polısıa departamenti málimdedi dep habarlaıdy bairaqmedia.kz

Kúdikti buǵan deıin Almaty oblysy PD-de qyzmet atqarǵan, alaıda teris sebeptermen jumystan bosatylǵan. Qazirgi ýaqytta bolǵan oqıǵanyń barlyq mán-jaıyn anyqtaý úshin tergeý amaldary júrgizilýde, - delingen Almaty qalalyq PD habarlamasynda.

Alaıda, bizdiń senimdi derekkóz áıelin pyshaqtap óltirgen polıseıdiń jumystan shyǵarylmaǵanyn, tipti búgin túste táýliktik kezekshilikten shyqqanyn málimdedi. Kúdikti túske deıin Almaty-Bishkek trassasynda qyzmette bolǵan. 

Al, Almaty oblystyq polısıa departamenti bolǵan jaǵdaı týraly eshqandaı aqparat bermeı otyr.

Eske salaıyq, qaıǵyly oqıǵa búgin túski ýaqytta Shuǵyla yqshamaýdanyndaǵy kópqabatty úılerdiń birinde bolǵan. Polısıaǵa kómek suraǵan áıeldiń daýsyn estigen kórshiler habarlasqan. 

Oqıǵa ornyna jetken jedel tergeý toby otbasylyq janjaldan soń, 39 jastaǵy er adamnyń áıelin pyshaqtap tastaǵanyn anyqtaǵan. Jábirlenýshi sol jerde til tartpaı ketken. Keıin kúdikti óz-ózine qol salmaq bolǵan. Iaǵnı, tamaǵyn pyshaqpen oryp jibergen.

Qan-josa bolǵan kúdikti osydan soń aýrýhanaǵa jetkizilgen. Qazir ol jansaqtaý bóliminde jatyr. 

Bizde bar málimetke sáıkes, áıelin pyshaqtap óltirgen qaskóı Almaty oblysynda jol-patrýldik polısıa batalóny quramynda qyzmet etken.

Al,  34 jastaǵy kelinshek Uzynaǵash aýylyndaǵy balabaqshada dırektor bolǵan eken. Ekeýiniń ortaq nekesinen 3 balasy bar.