Almatyda áıelin pyshaqtap óltirgen polıseı qandy qylmysty balalarynyń kózinshe jasaǵan. Kórshi-qolańdy shyryldap kómekke shaqyrǵan da sol kishkentaı ul-qyzdar eken dep habarlaıdy bairaqmedia.kz

Qandy oqıǵa bolǵan Shuǵyla yqshamaýdanyndaǵy páterdiń esigi qazir mórlengen. Al, kúdiktiniń beti beri qarap, jansaqtaý bóliminen palataǵa aýystyrylypty. Dárigerler onyń densaýlyǵyn ortasha aýyr dep baǵalap otyr. 

Soraqysy sol, munyń bári kishkentaı ul-qyzdardyń kóz aldynda bolǵan. Erli-zaıyptynyń 3 balasy bar eken. Kórshilerin kómekke solar shaqyrǵan. 

Shý boldy úı jaqta júrgen kezimizde. Sosyn kómek surady kishkentaı qyzdary men úlken balalary. Sonymen, úıden shyǵyp bardym. Barsam, jańaǵy jaǵdaı bolyp jatyr. Pyshaqtaǵan. 103 pen 102 shaqyryldy. Olar 4-5 mınýttyń ishinde kelip, ary qaraı kómek kórsetý bastaldy, - dedi kórshilerdiń biri.

Al, kıkiljińge otbasylyq janjal sebep bolǵan. Kórshi-qolań olardyń jıi urysqanyn, al kúdiktiniń ishimdikke áýes bolǵanyn aıtyp otyr.

Bul er adamnyń jıi ishimdik ishkeni týraly bildim. Ol polısıa qyzmetkeri bolǵan. Sol páterde únemi tóbeles bolatyn. Iaǵnı, erli-zaıypty únemi janjaldasyp jatatyn, - dedi kópqabatty úıdiń taǵy bir turǵyny.

Dese de, resmı málimetke súıensek, 39 jastaǵy kúdikti sol kúni sap-saý bolǵan. Qazir polıseıler istiń mán-jaıyn anyqtaýǵa tyrysýda. Qylmystyq is qozǵalǵan. Qandy oqıǵa  senbi túski ýaqytta bolǵan. Er adam óz páterinde áıelin pyshaqtap óltirgen. Keıin óz-ózine qol salǵan. Ol tiri qaldy. 

Beıresmı málimet boıynsha, qandy qylmys jasaǵan polıseı jumystan shyǵarylmaǵan, tipti senbi kúni túste táýliktik kezekshilikten shyqqan kórinedi. Dese de, Almaty qalalyq polısıa departamenti onyń polısıada qyzmet etkenin rastaǵanymen, buǵan deıin jumystan shyǵarylǵan dep otyr.