Qazaqstanda iri saýda, oıyn-saýyq ortalyqtarynda órtten zardap shekkenderge keltirilgen zalaldyń ornyn toltyrý kózdelip otyr. Bul týraly Qarjy naryǵyn retteý jáne damytý agenttigi tóraǵasynyń orynbasary Marıa Hadjıeva málimdedi,  dep habarlaıdy Bairaqmedia.kz.

Onyń aıtýynsha, bıyl adamdar kóp jınalatyn obektiler ıelerine jaýapkershiliktiń júktelgen saqtandyrýyn engizý josparda bar. Sonymen qatar apatty táýekelderden saqtandyrý júıesin kóp deńgeıli etý jáne birneshe kózden ótemaqy tóleý kózdelgen. 

Saýda ortalyqtarynda jáne adamdar jappaı jınalatyn aýdany 2 myń sharshy metrden asatyn iri obektilerinde órtten zardap shekkenderge zalaldy óteý qamtamasyz etilmek. Zań jobasy QR Parlamentiniń qaraýynda.

Marıa Hadjıeva atap ótkendeı,  elimizdiń aýmaǵynda túrli tabıǵı apattar qaýpi bar. Bul – jer silkinisi, sý tasqyny, orman órtteri, qurǵaqshylyq jáne daýyl. 

«Almatydaǵy jer silkinisi men elimizdiń soltústigi jáne batysynda sý tasqynynan zardap shekken 224 eldi meken apattar qaýpi bar aımaqtarda azamattardyń múlkin qorǵaýdyń qosymsha júıesin qurý qajettiligin rastady. Búgingi tańda halyqty osyndaı saqtandyrýmen qamtý kórsetkishi óte tómen – el boıynsha shamamen 3,2%-dy quraıdy. Halyqaralyq tájirıbe kórsetkendeı, apatty saqtandyrýdyń tıimdi júıeleri árdaıym kóp deńgeıli bolyp tabylady jáne birneshe kózderden tólemderdi qamtıdy. Sondyqtan biz memlekettik-jekeshelik áriptestiktiń túrli nusqasyn, sonyń ishinde búdjet shyǵyndaryn, saqtandyrýdy jáne syrtqy qarjylandyrýdy tartýdy qarastyramyz», – dedi Marıa Hadjıeva.

Agenttik qabyldanyp jatqan sharalar azamattardyń áleýmettik qorǵalýyn qamtamasyz etedi jáne saqtandyrý mádenıetin damytýǵa yqpal etedi dep sanaıdy.