Búgin Sherzat Polattyń ólimine qatysty qaralyp jatqan sot isinde Talǵar qalasynyń turǵyny Sáken Ákejanov kýáger retinde jaýap berdi,  dep habarlaıdy Bairaqmedia.kz.

Ol oqıǵa bolǵan túni kórgen-bilgenin aıtty.

Men uıyqtap jatqanmyn. Eki tars etken dybys estildi. Men motoksıkl dep oıladym. Sosyn áıeldiń daýsyn estidim. «Skoryı» shaqyryńdar degendeı boldy. Balkonǵa shyqsam, on shaqty jigit júgirip bara jatyr. Bir jigitti tepkiledi. Men «qoıyńdar, óltiresińder ǵoı» dep aıqaıladym, — dedi kýáger Sáken Ákejanov.

Ákejanov oqıǵa óte tez bolǵanyn jáne jedel járdem men polısıaǵa birden habarlasa almaǵanyn, sebebi oqıǵa nebári 1–2 mınýt ishinde aıaqtalǵanyn aıtty.

Sotta qorǵaýshylar kýágerdiń tergeý kezindegi jaýabyn naqtylaýdy surap, «Qolynan myltyqty tartyp aldy» degen jaýabyna silteme jasady. 

«Qolynan aldy ma, jerden aldy ma túsinbeı qaldym. Bir zatty aldy da, sol zatpen basynan urdy», — dep jaýap berdi ol.