Semeıde transulttyq temeki qylmysyna qatysy bar 3 adam sottaldy, dep habarlaıdy Bairaqmedia.kz.

Semeıde temeki ónimderin zańsyz aınalymǵa túsirgen transulttyq uıymdasqan toptyń úsh múshesine qatysty aıyptaý úkimi shyqty. Tergeýdi Qarjy monıtorıńi agenttiginiń Abaı oblysy boıynsha departamenti júrgizgen.

Tergeý nátıjesinde 8 adamnan turatyn, onyń ishinde 3 shetel azamaty bar qylmystyq toptyń Qyrǵyzstannan jalǵan qujattar arqyly 9,3 mıllıon qorap temekini zańsyz ákelgeni anyqtaldy. Temeki ónimderi Almaty, Jambyl, Pavlodar jáne Túrkistan oblystarynda satylǵan, bir bóligi Reseıge jóneltilmek bolǵan.

Zańsyz ónimder tárkilenip, tólenbegen aksız somasy 2,6 mıllıard teńgege jetti.

Tergeý aıasynda 9 avtokólik pen jeke turǵyn úı buǵattaldy. Sonymen qatar, 157 myń AQSH dollary kólemindegi qolma-qol aqsha men quny 840 myń teńge bolatyn «777» VIP avtonómir tárkilendi.

Sot úkimimen D.Bekeshev, D.Satybaldıev jáne D.Sýltanov QR QK 264-babynyń 2-bóligi jáne 214-babynyń 2-bóligi boıynsha kináli dep tanylyp, 8 jylǵa bas bostandyǵynan aıyryldy. 166 mln teńgege baǵalanǵan múlik memleket menshigine ótti, – delingen QMA habarlamasynda.

Qalǵan bes kúdiktige halyqaralyq izdeý jarıalanǵan. Olardyń biri Reseı aýmaǵynda ustalyp, ekstradısıalaý máselesi qaralyp jatyr.