Aqtaýlyq erli-zaıypty, ıaǵnı, tanymal ánshi Abaı Begeıdiń qyzy Gúlerkem Nıazqulova kúıeýimen birge Instagram, TikTok jáne Telegram jelilerinde 850 myńnan astam oqyrmandarynyń arasynda aýqymdy onlaın-lotereıalar uıymdastyrǵany úshin isti bolyp jatyr, dep habarlaıdy bairaqmedia.kz
Qarjylyq monıtorıń agenttiginiń málimetinshe, bul lotereıalarǵa 1 800-den astam azamat qatysqan. Zańsyz qyzmet arqyly tapqan qylmystyq tabys kólemi 162 mln teńgeden asqany anyqtaldy.
Lotereıa operatory retinde tirkelmegenine qaramastan, olar avtokólik, páter jáne basqa da baǵaly júldeler oınatqan. Qatysýshylar quny 500-den 50 000 teńgeni quraıtyn bılet (sıfrlyq nómir) satyp alyp otyrǵan, — delingen habarlamada.
Tergeý málimetterine sáıkes, qazir kúdiktilerdiń múlki men bank shottaryna tyıym salyndy. Sotqa deıingi tergeý jalǵasyp jatyr.
Azattyq Rýhy portalynyń aqparatyna sáıkes, utys oınatatyn Instagram paraqshasyn 2022 jyldan beri belsendi júrgizip kele jatqan Gúlerkem Nıazqulova zańsyz áreketteri úshin 2024 jyly 1 107 600 teńge aıyppul tólegen. Onyń utys oıyndaryn ótkizýshe eshqandaı quqyǵy joǵy anyqtaldy.
«Atalǵan paraqshanyń ıesi Nıazqulova Gúlerkem Abaıqyzyna qatysty «Lotereıalar jáne lotereıa qyzmeti týraly» Qazaqstan Respýblıkasy Zańynyń 5-babynyń 4, 5-tarmaqtarynda belgilengen talaptardy buzýy boıynsha 2024 jylǵy 24 mamyrdaǵy №15 ákimshilik quqyq buzýshylyq týraly hattama toltyrylyp, Mańǵystaý oblysy Munaıly aýdandyq sotynyń 2024 jylǵy 8 tamyzdaǵy qaýlysymen atalǵan tulǵa tıisti ákimshilik jaýaptylyqqa tartylyp, oǵan 1 107 600 tenge aıyppul salynǵan», - dep habarlady komıtetten.
Elimizde 15 jyl merzimge lotereıa ótkizý quqyǵy berilgen jalǵyz operator - «Sátti Juldyz» AQ bolyp bekitilgen. «Sátti Juldyz» «Instagram» áleýmettik jelisindegi «@erke_rezerve (Niyazkulova Erke)» lotereıa agenti emes ekenin rastady. Abaı Begeıdiń qyzy lotoreıa operatorymen shart jasaspaǵan.
Al Zańnyń 5-babynyń 4) jáne 5) tarmaqtaryna sáıkes, lotereıa operatory emes tulǵanyń lotereıa ótkizýine jáne lotereıa operatory nemese lotereıa agenti emes tulǵanyń lotereıa bıletterin, elektrondyq lotereıa bıletterin taratýyna (ótkizýine) tyıym salynǵan.
Zańnamany buzǵan blogerge sol úshin de «utys oıyndarynda kórsetip júrgen býma-býma aqshasynan áldeqaıda kem» aıyppul salynǵan.
