Шығыс Қазақстан облысы прокуратурасының тексеруінен кейін №18 түзету мекемесінде медициналық қызмет көрсету барысында заңсыз қаржылық операциялар жүргізілгені анықталды, деп хабарлайды Bairaqmedia.kz.

Шемонайха ауданы прокуратурасының мәліметінше, хирург 2023 жылғы желтоқсанда колонияға жоспарлы сапар барысында 15 сотталғанды тексерген. Алайда есептік құжаттарда бұл көрсеткіш 160 адам деп көрсетілген. Соның негізінде дәрігерге 214 мың теңге мөлшерінде жалақы есептелген. Шынайы деректерге сәйкес, ол 15 науқасты қабылдағаны үшін 15 252 теңге ғана алуға тиіс еді.

Осыған ұқсас заңбұзушылықтар дерматовенеролог, нарколог, невропатолог және психиатр дәрігерлерінің қабылдауларында да болған. Жалпы алғанда, бюджеттен негізсіз төленген қаражат көлемі 1,4 миллион теңге болды.

Тексеру нәтижесінде заңсыз төленген қаржы толығымен бюджетке қайтарылды. Жауапты тұлғалар тәртіптік жауапкершілікке тартылды, – деп мәлімдеді прокуратура өкілдері.

Құзырлы органдар медициналық қызмет көрсету саласындағы осындай заңбұзушылықтарды болдырмау мақсатында бақылауды күшейту қажеттігін атап өтті.