Премьер-министр Олжас Бектенов мемлекет басшысының тапсырмасына сәйкес авиаотын нарығын дамыту мәселелері бойынша кеңес өткізді, деп хабарлайды Bairaqmedia.kz.

Жиын барысында баға белгілеу тетіктерін жетілдіру, ішкі өндірісті арттыру және әуежай инфрақұрылымын жаңғырту жайы талқыланды.

Бәсекелестікті қорғау және дамыту агенттігінің төрағасы Марат Омаров көтерме және бөлшек саудада, соның ішінде әуежайлар арқылы авиаотынды сатудың жаңа тәсілдерін ұсынды. Сонымен қатар, импортты алмастыру шараларына ерекше көңіл бөлінді.

«ҚазМұнайГаз» дерегінше, 2031 жылға қарай «ПетроҚазақстан Ойл Продактс» ЖШС-нің кеңеюі нәтижесінде авиаотын өндірісі 1,5 млн тоннаға дейін ұлғаяды.

Жиында әуежайларды қаржыландыру құрылымын өзгертіп, табыс көзін әртараптандыру, сервистік модельді енгізу мәселелері де қаралды. Бұл әуежайлардың авиаотыннан түсетін бақылаусыз табысқа тәуелділігін азайтады.

Кеңеске энергетика және көлік министрлері, сондай-ақ «ҚазМұнайГаз» компаниясының өкілдері қатысты. Премьер-министр нақты тапсырмалар беріп, саланы жүйелі жаңғыртуды міндеттеді.