Белгілі ақын Мұхаммеджан Тазабек өзінің әлеуметтік желідегі парақшасында бұрынғы премьер-министр, мемлекет және қоғам қайраткері Иманғали Тасмағамбетовпен арасындағы есте қаларлық оқиғаны бөлісті, деп хабарлайды Bairaqmedia.kz.

Ақын 2001 жылы Президент оркестрінің құрамында ел тәуелсіздігінің 10 жылдығына арналған үлкен шараға қатысуы тиіс болғанын еске алады.

«Имекең микрофонды алып: «Сен мына сақалыңды алып тастайсың ба?» – деді. Егер алмаймын десең, жарайды, бірақ онда өлеңіңді басқа адам орындайды» деді, – деп еске алады Тазабек.

Ақын сахнаға шығудан бас тартып, өлеңін басқа біреудің орындауына келіскен. Алайда, бұл шешімінен кейін біраз уақыт бойы «қатты қысым көрем бе?» деп уайымдағанын жазды.

«Біраз уақыт қатқыл үкім қай жақтан келер екен деп, қауіптеніп жүргенім өтірік емес. Себебі, әжептеуір адамдар ескерту жасады ғой…» – дейді ол.

Кейін 2005 жылы кіші қажылық кезінде Тазабек Тасмағамбетовпен Мәдинада қайта жүздесіп, бұрынғы оқиғаны еске салған. Бұған Иманғали Тасмағамбетов «қашан ел боламыз?! Осы, азаматтардың ортасына от жаққанды қашан қоямыз?!» деп жауап берген.

Ақын бұл кездесуден кейін үлкен ой түйгенін жеткізеді. Жазбасының соңында ол қазіргі қоғамда болып жатқан саяси, рухани және әлеуметтік дағдарыстарға тоқталып, жұртты бірлікке, сабырға, даналыққа шақырды. 

Тазабек бұған қоса қоғамдағы өсек пен дау-дамайдан шаршағанын, ел болып, елдік сөз айтып, бірлікке бет бұрудың маңыздылығын атап өтті.

«Саясатты Тоқаевқа тапсырып, дінді имамдардан үйреніп, батаны ата-анадан алып, махабатты отбасыңнан ғана іздеп, тыныш жүргеннен артығы жоқ…», – деді ақын.