Астана полиция департаменті Қазақстанның Біріккен Араб Әмірліктеріндегі елшісінің бұрынғы кеңесшісі Сәкен Мамашқа қатысты тергеу жұмыстарын бастады, деп хабарлайды Bairaqmedia.kz.
Еске сала кетсек, Сәкен Мамаштың әйелі Карина 2024 жылдың 6 мамырында күйеуінің 10 жыл бойы жүйелі түрде ұрып-соғып келгенін әлеуметтік желі арқылы көпшілікке жеткізген болатын. Әйел бұл зорлық-зомбылықтан кейін қоғамдық белсенділерден көмек сұрап, Сәкен Мамаштың дипломатиялық мәртебесінен айырып, оны түрмеге қамауды талап етті.
Осыдан соң, ҚР Сыртқы істер министрлігі мен Астана полициясы қылмыстық іс қозғады.
Полиция тергеу амалдарын жүргізіп, жедел-тергеу тобын құрды. Қажетті сараптамалар өткізілді. Тергеудің қорытындысы бойынша, Сәкен Мамашқа қатысты қамауға алу түріндегі бұлтартпау шарасы қабылданды, – делінген хабарламада.
Қазір тергеу процесі жалғасып жатыр, бірақ тергеу мүддесіне байланысты басқа мәліметтер жария етілмейді.
