Ішкі істер министрлігі Әкімшілік полиция комитетінің төрағасы Қайсар Сұлтанбаев жаяу жүргінші жолағынан өтіп бара жатқан 7 жасар қызды өткізіп жібермеген автобус жүргізушісі жауапқа тартылғанын мәлімдеді, деп хабарлайды Bairaqmedia.kz.

Автобус тоқтамай өтіп кетті, сол сәтте қыз артқа бір қадам жасады. Дәл осы кезде жүк көлігінің жүргізушісі оны байқамай қалған – себебі қыз соқыр аймақта тұрған. Салдарынан адам өлімімен аяқталған жол-көлік оқиғасы болды, – деп түсіндірді Сұлтанбаев.

Жол апатына байланысты қылмыстық іс қозғалып, оқиғаға қатысушылардың кінә дәрежесін анықтау үшін тиісті сараптамалар тағайындалды.

«Кім кінәлі болса, сол жауап береді. Алдын ала мәлімет бойынша, автобус жүргізушісі жаяу жүргіншіні өткізбегені үшін жауапқа тартылды, – деді комитет төрағасы.

Бұған дейін жүргізушінің кінәсі дәлелденсе, жүк көлігінің жүргізушісіне 5 жылға дейін бас бостандығынан айыру жазасы қарастырылғаны хабарланған болатын.