Қарағанды облысында өрт кезінде ер адам құтқарылды, деп хабарлайды Bairaqmedia.kz. 

ТЖМ мәліметінше, бүгін таңертең Теміртау қаласының Тищенко көшесінде екінші қабаттағы пәтерде өрт шыққан. Үй заттары мен жиһаздың өртенуі салдарынан қою түтін пайда болған.

Оқиға орнында газ-түтіннен қорғау қызметі буынының жұмысы дереу өрістетілді. Өрт сөндірушілер түтін басқан бөлмеден 1962 жылы туған ер адамды алып шықты. Ол бағдарын жоғалтып, түтінмен дем алып, уланып қалған, – делінген хабарламада.

Жәбірлену жедел медициналық жәрдем бригадасының қызметкерлеріне тапсырылды. Алғашқы медициналық көмек көрсетілгеннен кейін ол әрі қарай тексеру және емдеу үшін орталық қалалық ауруханаға жеткізілді.

Өрт 5 шаршы метр алаңда қысқа мерзімде сөндірілді. Өрттің себебі анықталып жатыр, – деп қосты ведомстводан.