Magnum желісінің жеткізу қызметіне қатысты жағдай әлеуметтік желіде қызу талқыланып жатыр деп хабарлайды bairaqmedia.kz

Орын алған оқиға туралы Threads қолданушыларының бірі жазды. Оның айтуынша, ол үйіне азық-түлікке тапсырыс беріп, курьермен сыпайы амандасқан. Артынша курьер қазақ тілінде “Атың кім?” — деп сұрайды. Орыс тілінде жауап берген тұтынушыға “Қазақша сөйле” деп айтқан.

Яғни, өз үйімде маған қай тілде сөйлеу керектігін көрсетіп жатыр. Бұл қалыпты ма? — деп жазды Асылхан есімді жігіт.

Ол мұндай жағдайға алғаш рет тап болғанын жазған. 

Менің бұл жағдайдан түйгенім — мұндай адамдар, өкінішке қарай, аз емес екен. Мәселе тілде емес, мәселе — адамдардың шектен шығатын мінез-құлқында. Өз үйіңде қай тілде сөйлейтініңе дейін араласу — бұл қашаннан бастап қалыптыға айналды? — деп жазды жігіт.

Оқиға желі қолданушылары арасында түрлі пікір тудырды. Бірі курьердің қазақ тілінде сөйлеуді сұрауын орынды деп санаса, енді бірі бұл әрекетті дөрекілік деп бағалады.

Кейін magnum желісі жігітпен байланысқа шығып, курьердің жұмыстан босатылғанын хабарлаған. 

Желі қолданушылары Асылхан есімді азаматтың бұл әрекетін қолдамады. Керісінше, бір азаматты жұмыссыз қалдырғаны үшін жерден алып, жерге салып жатыр. 

Сондай-ақ, жұрт қазақша сөйлеуді талап еткен курьерді жұмыстан қуған Magnum-ға бойкот жариялап, сауда желісінің қызметінен бас тартып жатыр.