Елімізде бүгіннен бастап мопед жүргізушілері толыққанды жол қозғалысына қатысушы болып есептеледі деп хабарлайды bairaqmedia.kz

Енді қос дөңгелекті көлік құралының иелері мопедті арнайы тіркеп, мемлекеттік нөмір алуға, жүргізуші куәлігіне ие болуға және сақтандыру рәсімдеуге міндетті. Бұл талапты орындамағандарға айыппұл салынып, мопедтері тәркіленеді.

Ішкі істер министрлігінің мәліметінше, бүгінге дейін елімізде 23 мыңнан астам мопед ресми тіркеуден өткен.

Талапқа бағынбағандар әкімшілік жауапкершілікке тартылады. Қазақстан Республикасы Әкімшілік құқықбұзушылықтар кодексіне сәйкес тіркелмеген мопедпен жүргені үшін жүргізушілерге 10 АЕК көлемінде айыппұл қарастырылған.

Сонымен қатар, құқық бұзушылардың мопедтерін айыптұраққа алып кетеді. Жағдай екінші рет қайталанса, айыппұл соммасы екі еселенеді.

Айта кетейік, былтыр тек Алматының өзінде мопедтердің қатысумен мыңнан аса жол-көлік оқиғасы тіркелген. Салдарынан, 17 адам қаза тапқан.