Премьер-министр Олжас Бектенов Ресей Федерациясы Үкіметі төрағасының орынбасары – Үкімет аппаратының басшысы Дмитрий Григоренкомен кездесу өткізді, деп хабарлайды Bairaqmedia.kz.
Кездесу барысында тараптар цифрландыру, жасанды интеллект, инвестициялар және инновациялық даму бағыттарындағы өзара іс-қимылды кеңейту мәселелерін талқылады.
«Мемлекет басшылары деңгейінде қол жеткізілген уағдаластықтарды жүзеге асыру – екі елдің өзара сенімді серіктестігін арттыра түсті. Қазақстан Президенті Қасым-Жомарт Тоқаев пен Ресей Президенті Владимир Путин арасындағы тұрақты байланыс нәтижесінде екіжақты қарым-қатынас жоғары қарқынмен дамуда» – делінген ресми ақпаратта.
2024 жылдың қорытындысы бойынша Қазақстан мен Ресей арасындағы тауар айналымы шамамен 3%-ға өсіп, 27,8 млрд АҚШ доллары болды. Тараптар бұл көрсеткішті одан әрі ұлғайту үшін сауда-экономикалық және инвестициялық ынтымақтастықтың зор әлеуеті бар екенін атап өтті.
Кездесуде жасанды интеллектіні пайдалану ауқымының кеңейіп келе жатқаны және осы саладағы екіжақты әріптестіктің маңыздылығы ерекше назарға алынды.
«Жаңа технологияларды енгізу бағытында күш-жігерді біріктіру IT-кәсіпкерлік пен стартаптарды қолдауға, білікті мамандар даярлауға және ақпараттық қауіпсіздік шараларын жетілдіруге жол ашады» – деп атап өтті тараптар.
Биыл Астанада Alem.ai халықаралық жасанды интеллект орталығының ашылуы жоспарланып отыр. Бұл бастама қазақстандық IT-мамандарға жаңа мүмкіндіктер ашпақ.
Жұмыс сапары аясында Дмитрий Григоренко Astana Hub және Nazarbayev University технопаркі сияқты еліміздің жетекші IT-орталықтарының қызметімен танысады. Аталған технопарктерде бүгінде 1600-ден астам IT-компания тіркелген, оның 425-і – шетелдік компаниялар.
Бұл кездесу Қазақстан мен Ресей арасындағы инновациялық және технологиялық серіктестікті жаңа деңгейге көтеруге септігін тигізбек.
