Қырғызстанда елде қайтыс болған адамдардың мәйітін кремациялауға тыйым салатын заңға өзгерістер енгізілді, деп хабарлайды Вairaqmedia.kz.
24.kg басылымның мәліметінше, 25 маусымда Жоғарғы Кеңес депутаттары «Жерлеу және жерлеу ісі туралы» заңға енгізілген түзетулерді қабылдаған. Енді оған Қырғызстан Президенті Садыр Жапаров қол қойды.
Заңға енгізілген өзгерістерге сәйкес, крематорийлерде қайтыс болған адамдардың мәйітін, сондай-ақ түсік нәтижесінде алынған және өлі туған ұрықтарды өртеуге тікелей тыйым салынады. Қырғызстандағы крематорийлер енді тек медициналық қызмет барысында пайда болатын биологиялық нысандарды санитарлық мақсатта термиялық жолмен жою үшін ғана пайдаланылмақ. Әңгіме адамның ағзалары мен тіндері туралы болып отыр.
Сондай-ақ заңнан марқұмдарды кремациялау, күлі салынған урналар, колумбарийлер және аза қабырғаларына қатысты ережелер алынып тасталды. Иесіз қалған және кім екені анықталмаған мәйіттерді тек зираттарда жерге жерлеуге рұқсат етіледі.
Медициналық биологиялық нысандарды жоюға арналған мамандандырылған құрылыстар республикалық және жергілікті бюджеттер, сондай-ақ жекеменшік компаниялардың қаражаты есебінен салынуы мүмкін.
