Көкшетаудағы Абай Мырзахметов атындағы университетке түсе алмаған талапкерлер құжаттарын қайтарып алып, басқа жоғары оқу орындарына тапсыру кезінде қиындыққа тап болғандарын айтты, деп хабарлады Вairaqmedia.kz.
Бұл туралы halyqstan арнасы жазды.
Талапкерлердің сөзінше, емтихан нәтижелері белгілі болғаннан кейін олар құжаттарын оқу орнынан алып, басқа университеттерге құжат тапсыруға шешім қабылдаған. Алайда құжаттарын қайтарып алу оңай болмаған.
Кейбір талапкерлер құжаттарын алу үшін басқа қаладан арнайы келген. Олардың бірі оқу орнына шамамен 300 шақырым жол жүріп жеткенін мәлімдеді.
«Құжаттарды неге бермей жатқандарын сұрағанымызда, ректордың орнында жоқ екенін айтты. Біз басқа оқу орнына құжат тапсырып үлгеру үшін арнайы келдік. Бірақ құжаттарымызды қайтармай отыр», – деді талапкерлер.
Олардың айтуынша, университеттің қабылдау комиссиясы құжаттарды қайтару үшін ректордың міндетті түрде қатысуы қажет екенін айтқан. Алайда бұл талаптың нақты себебі түсіндірілмеген.
Талапкерлер құжаттарды беруді созу олардың басқа оқу орындарына уақытында тапсырып, білім алуға мүмкіндік алуына кедергі келтіруі мүмкін екенін айтып отыр.
