Қазақстан Израиль нарығына 200 мыңнан 500 мың тоннаға дейін азық-түлік бидайын жеткізу мүмкіндігін қарастырып жатыр. Бұл туралы Ауыл шаруашылығы министрлігі хабарлады, деп хабарлады Bairaqmedia.kz.
Мәселе Иерусалимде өткен Қазақстан мен Израиль арасындағы сауда-экономикалық ынтымақтастық жөніндегі үкіметаралық комиссияның оныншы отырысында талқыланды. Кездесуде «Продкорпорация» ұлттық компаниясы басқарма төрағасының орынбасары Самат Теньбаев Қазақстанның астық экспорттау мүмкіндіктерін таныстырды.
«Продкорпорация Израиль нарығының қажеттіліктерін ескере отырып, 200 мыңнан 500 мың тоннаға дейін азық-түлік бидайын және басқа да ауыл шаруашылығы өнімдерін жеткізу бойынша ұзақ мерзімді келісімшарттар жасасу мүмкіндігін қарастыруға дайын», – деді Самат Теньбаев.
Министрлік мәліметінше, Израиль жыл сайын шетелден 2 миллион тоннадан астам бидай сатып алады. Сондай-ақ елде арпа, жүгері және майлы дақылдарға сұраныс жоғары. Қазақстан Израиль нарығына ақуызы мен желімтегі мол, сапалы бидай ұсынуды көздеп отыр. Алайда астық экспортындағы негізгі кедергілердің бірі – тасымалдау шығыны. Екі ел арасындағы қашықтықтың үлкен болуына байланысты өнімді жеткізу қымбатқа түсуі мүмкін.
Сондықтан қазақстандық тарап астықты Әзербайжан мен Грузия арқылы өтетін көлік дәлізімен тасымалдауды ұсынды. Балама бағыт ретінде Балтық теңізіндегі порттарды пайдалану мүмкіндігі де қарастырылып жатыр. Бұдан бөлек, Қазақстан Израильдің ауыл шаруашылығындағы озық технологияларын енгізуге қызығушылық танытты. Атап айтқанда, су үнемдейтін суару жүйелерін қолдану, тазартылған суды қайта пайдалану, өндірісті цифрландыру және жасанды интеллект технологияларын дамыту мәселелері талқыланды.
Ауыл шаруашылығы министрлігінің мәліметінше, қазақстандық ауыл шаруашылығы өнімдері бүгінде әлемнің 80-нен астам еліне экспортталады. Айта кетейік, Израильге бидай жеткізу жөніндегі келісімшарт әзірге жасалған жоқ. Қазіргі уақытта тараптар экспорт көлемі мен ықтимал тасымалдау бағыттарын талқылап жатыр.
