Францияда 5 қараша күні өткен ауқымды наразылық акциялары кезінде жүздеген адам ұсталып, ондаған полиция қызметкері жарақат алды. Елдегі ереуіл салдарынан Эйфель мұнарасы мен Лувр музейінің кейбір көрме залдары жабылды, деп хабарлайды Bairaqmedia.kz.
Францияда бұл күн «қара бейсенбі» деп аталды. Бес ірі кәсіподақ ұйымдастырған жалпыхалықтық ереуілге жұмысшылармен қатар студенттер, жоғары сынып оқушылары және қымбатшылыққа наразы тұрғындар қосылды. Наразылық салдарынан мектептер, ауруханалар мен қоғамдық көлік жұмысына кедергі келді. Париждегі әйгілі Эйфель мұнарасы келушілер үшін уақытша жабылды. Ереуілге қатысушылар ең төменгі жалақыны көтеруді, білім беру саласын қаржыландыруды арттыруды және мемлекеттік қызметтердің сапасын жақсартуды талап етті.
Наразылыққа қатысушылар санына қатысты деректер әртүрлі. Францияның Жалпы еңбек конфедерациясы (CGT) ел бойынша 1,6 миллион адам көшеге шыққанын мәлімдеді. Оның 350 мыңы Парижде шеруге қатысқан. Ал Ішкі істер министрлігі ел бойынша 575 мың, астанада 65 мың адам жиналғанын хабарлады. Полиция мәліметінше, шерулердің басым бөлігі бейбіт өткенімен, Париж, Ренн, Тулуза, Бордо және Страсбург қалаларында қақтығыстар тіркелген. Тәртіп сақшылары көзден жас ағызатын газ бен су атқыштарды қолданған. Кейбір көшелерде өрт шыққан, ал Тулуза маңында мектеп ғимараты өртенген.
Соңғы мәлімет бойынша, 448 адам ұсталып, қауіпсіздік күштерінің 53 қызметкері жарақат алған. Наразылық білдірушілер арасындағы зардап шеккендер туралы ресми ақпарат жарияланбаған.
9 қарашада Франция премьер-министрі Себастьен Лекорню кәсіподақтар мен жұмыс берушілер өкілдерінің қатысуымен әлеуметтік конференция өткізуді жоспарлап отыр. Кездесуде жалақы мен халықтың сатып алу қабілеті талқыланбақ. Айта кетейік, Францияда биыл күзде наразылық акциялары бірнеше рет өткен. Қазан айындағы шерулер кезінде, БАҚ мәліметінше, екі мыңнан астам адам ұсталған.
