Қазақстанда ауылдық жерлерде жұмыс істейтін ветеринар мамандардың жалақысын кемінде 25 пайызға арттыру, баспана алуға қаржылай көмек көрсету және еңбек демалысына шыққанда екі айлық көлемінде сауықтыру жәрдемақысын төлеу ұсынылды. Құрылтай депутаттары тиісті заң жобасын бірінші оқылымда мақұлдады, деп хабарлайды Bairaqmedia.kz.
4 қарашада Құрылтай отырысында ветеринария саласын жаңғыртуға бағытталған заң жобасы қаралды. Құжатта әсіресе ауылдық жерлердегі маман тапшылығын азайтуға және ветеринар дәрігерлердің әлеуметтік жағдайын жақсартуға басымдық берілген. Құрылтай депутаты Серік Егізбаевтың айтуынша, ветеринар мамандардың еңбек жағдайы мен әлеуметтік қорғалуы саланың өзекті мәселелерінің бірі болып отыр.
Заң жобасында ауыл ветеринарларына мынадай қолдау шаралары қарастырылған:
Ауылдағы мамандардың лауазымдық жалақысын қаладағы әріптестерімен салыстырғанда кемінде 25 пайызға көтеру;
Тұрғын үй сатып алуға немесе салуға қаржылай көмек көрсету;
Пәтер жалдау және коммуналдық қызмет шығындарын өтеу;
Жыл сайынғы ақылы еңбек демалысына шыққанда кемінде екі лауазымдық айлықақы көлемінде сауықтыру жәрдемақысын төлеу;
Санаторийде емделу мен демалуға қосымша қолдау көрсету.
Ауылдық жерлерге арналған бірқатар жеңілдіктер жергілікті өкілді және атқарушы органдардың шешімімен жүзеге асырылуы мүмкін. Сонымен қатар ғылыми дәрежесі бар ветеринарларға ай сайын үстемеақы төлеу ұсынылып отыр. Атап айтқанда, ғылым кандидаттарына 17 АЕК, ғылым докторларына 34 АЕК мөлшерінде қосымша ақы қарастырылған.
Ветеринар мамандардың кәсіби құқықтарын қорғау үшін арнайы Ветеринариялық палата құру да жоспарланып отыр. Ұйым мамандардың мүддесін қорғаумен, олардың есебін жүргізумен және біліктілігін арттырумен айналысады. Бұдан бөлек, ветеринарларды арнайы жұмыс киімімен және қажетті жабдықтармен қамтамасыз ету, қызметтік міндетін атқару кезінде денсаулығына зиян келсе, өтемақы төлеу тетіктерін жетілдіру ұсынылған.
Депутат Серік Егізбаевтың мәліметінше, заң жобасында көзделген шараларды жүзеге асыруға мемлекеттік бюджеттен жыл сайын шамамен 27 миллиард теңге бөлу жоспарланып отыр. Жаңа өзгерістер тек ветеринарлардың жағдайын жақсартумен шектелмейді. Заң жобасында ветеринариялық препараттардың сапасын бақылауды күшейту, мал өнімдерінің қауіпсіздігін қамтамасыз ету және ветеринариялық қадағалауды жетілдіру де көзделген.
Айта кетейік, құжат әзірге бірінші оқылымда ғана мақұлданды. Ұсынылған жеңілдіктердің күшіне енуі үшін заң жобасы заң шығару рәсімдерінің қалған кезеңдерінен өтуі тиіс.
