Қазақстанда алимент төлеуден жалтарып жүрген азаматтардың табысын анықтау үшін жаңа цифрлық тетіктер әзірленіп жатыр. Енді сот орындаушылары борышкерлердің такси қызметінен, курьерлік жеткізуден, құмар ойындардан және электронды ақша операцияларынан түсетін кірісін анықтай алады, деп хабарлады Bairaqmedia.kz.
Бұл туралы Премьер-министр Олжас Бектенов депутаттардың сауалына берген жауабында мәлімдеді.
Борышкерлердің қандай табысы тексеріледі?
Үкімет басшысының айтуынша, сот орындаушыларының борышкерлердің кіріс көздерін анықтау жөніндегі өкілеттігі заң жүзінде кеңейтілген. Енді олар интернет-платформалар мен мобильді қосымшалардың операторларынан, сондай-ақ ойын бизнесін ұйымдастырушылардан қажетті мәліметтерді сұрата алады.
Сонымен қатар мемлекеттік органдардың ақпараттық жүйелерін өзара біріктіру жұмыстары жүргізіліп жатыр. Бұл арқылы: такси және басқа да жолаушылар тасымалынан түсетін табысты; курьерлік және жеткізу қызметінен түсетін кірісті; құмар ойындардан түсетін қаражатты; электронды ақшамен жасалатын операцияларға қатысты мәліметтерді анықтау көзделіп отыр.
Алимент бойынша қарыз қалай есептеледі?
Қолданыстағы тәртіп бойынша алимент қарызы борышкердің нақты жалақысы мен өзге де табысына қарай есептеледі. Егер азамат жұмыс істемесе немесе кірісін растайтын құжаттары болмаса, берешек Қазақстандағы орташа айлық жалақы негізінде анықталады.
Егер үш ай бойы алиментті жалақыдан немесе басқа кірістерден өндіру мүмкін болмаса, сот орындаушысы берешек мөлшерін анықтап, мәжбүрлеп орындату шараларын қабылдауға міндетті. Мұндай жағдайда борышкердің мүлкіне де өндіріп алу шаралары қолданылуы мүмкін.
Сондай-ақ қарыздың бір бөлігін ғана төлеу қалған берешектен босатпайды.
Жаңа жүйе не үшін қажет?
Қазір атқарушылық іс жүргізудің автоматтандырылған ақпараттық жүйесі мемлекеттік органдармен, банктермен және басқа да ұйымдармен ақпарат алмасады. Ол борышкердің ресми жұмыс орнын, жұмыс берушісін және еңбек қатынастары туралы мәліметтерді анықтауға мүмкіндік береді.
Жаңа интеграцияның мақсаты – азаматтардың ресми жалақыдан бөлек табыс көздерін де анықтап, алимент өндірудің тиімділігін арттыру. Осылайша, балаларын асырауға міндетті азаматтардың кірісін жасырып, алимент төлеуден жалтаруына тосқауыл қою көзделіп отыр.
Үкіметтің мәліметінше, бұл бағыттағы жұмыстар жалғасып жатыр. Алайда жаңа ақпараттық жүйелерді біріктіру жұмыстарының толық қашан аяқталатыны әзірге нақтыланбаған.
