Қазақстан мұсылмандары діни басқармасы (ҚМДБ) күнделікті өмірде қолданылатын шет тіліндегі діни атаулардың орнына қазақ тілінде бұрыннан қалыптасқан баламаларды пайдалануға шақырды, деп хабарлады Вairaqmedia.kz.
Діни басқарма өкілдерінің түсіндіруінше, Құран сүрелерін, намаздағы дұғалар мен зікірлерді араб тілінде оқудың шариғатта өзіндік орны бар. Алайда күнделікті сөйлесу барысында қазақ тілінде баламасы бар сөздерді шет тіліндегі атаулармен алмастырудың қажеті жоқ. Мәселен, соңғы уақытта жиі айтылатын «ифтар» және «сухур» сөздерінің орнына қазақ халқы ғасырлар бойы қолданып келген «ауызашар» мен «сәресі» атауларын пайдаланған жөн.
ҚМДБ бес уақыт намаздың атауларын да қазақша қолдануға шақырды. Атап айтқанда, «таң», «бесін», «екінті», «ақшам» және «құптан» сөздері халқымыздың діни танымында бұрыннан қалыптасқан. Сонымен қатар мұсылмандар арасында жиі қолданылатын «ахи», «ухти», «абла», «аби», «брат», «сестра» сөздерінің орнына «бауырым», «ағам», «інім», «әпкем», «апам», «қарындасым» деген қазақша атауларды қолдану ұсынылды. Діни басқарманың пікірінше, мұндай сөздер адамдар арасындағы жақындық пен сыйластықты білдіріп қана қоймай, ұлттық тілдік дәстүрді сақтауға да ықпал етеді.
Айта кетейік, бұған дейін Мемлекет басшысы Қасым-Жомарт Тоқаев Халықаралық «Қазақ тілі» қоғамының Х құрылтайында сөйлеген сөзінде қазақ тілінде араб сөздерінің орынсыз қолданылуына назар аударған болатын.
