Абай облысының әкімі Берік Уәли өңір тұрғындарына арнайы бейнеүндеу жасап, аймақтың тазалығын сақтау және экологиялық мәдениетті қалыптастырудың маңыздылығын атап өтті, деп хабарлайды Bairaqmedia.kz.

«Бұл – біздің ортақ үйіміз. Оны таза, жайлы, көрікті етіп ұстау – әрқайсымыздың азаматтық борышымыз», – деді өңір басшысы.

Әкім өз сөзінде облыстың көлік-логистикалық маңызы артып келе жатқанын, бұл үлкен мүмкіндіктермен қатар, зор жауапкершілік жүктейтінін айтты.

Өңір басшысы тазалықтың маңыздылығына тоқталып, бұл тек жылына бір рет өтетін сенбілікпен шектелмеуі керек екенін айтты.

«Ал тазалық дегеніміз – жылына бір рет сенбілікке қатысу емес, бұл – біздің өңірде қалыптасуы тиіс үлкен мәдениет», – деді Берік Уәли.

Облыста «Таза Қазақстан» бағдарламасы аясында кең ауқымды сенбілік басталатыны хабарланды. Алайда бұл бір реттік акция емес, оны тұрақты дәстүрге айналдыру көзделіп отыр.

Сонымен қатар, аймақ басшысы үздіктерді анықтау мақсатында арнайы байқау ұйымдастырылатынын мәлімдеді.

«Біз арнайы байқау жариялап, «үздік аудан», «үздік ауыл», «үздік аула», «үздік университет», «үздік колледж», «үздік мектеп», «үздік балабақша», «үздік көше», «үздік мекеме» номинациялары бойынша шынайы жанашыр жандарды анықтаймыз. Әрине, жеңімпаздарға қомақты сыйлықтар да тағайындалады», – деді әкім.

Өңір басшысы облыс орталығы ретінде Семейдің дамуына ерекше тоқталып, қаланың еліміздің ірі мегаполистерінен үлгі алу қажеттігін айтты.

«Облыс орталығы ретінде екінші тынысы енді ашыла бастаған қаламыз ешбір шаһардан кем емес. Біз еліміздің мегаполистері Астана, Алматы, Шымкент сияқты ірі қалаларынан үлгі алуымыз керек».

Әкім өңірде тазалыққа қатысты ауқымды жұмыстар атқарылып жатқанын да атап өтті.

«Биылдың өзінде облыста 400 шақырым жол жөнделіп, «Ауыл – Ел бесігі» бағдарламасы аясында 223 шақырым жол қайта жаңғыртылады. 77 мың түп ағаш егіледі», – деді ол.

Сонымен қатар, Семейде:
- 22 аула абаттандырылады;
- 8 қоғамдық орын жаңартылады;
- 210 автобус аялдамасы орнатылады;
- 60 жаңа автобус сатып алынады;
- 10 арнайы тазалық техникасы алынды.

Аймақ басшысы өңір тұрғындарын тазалық пен абаттандыру шараларына белсенді қатысуға шақырды.

«Абай облысының әрбір тұрғыны туған жердің тазалығына, көркеюіне бірге үлес қосайық. Алыптар түлеген киелі топырақтың ажарына әр беру – әрқайсымыздың қасиетті борышымыз!», – деді Берік Уәли.

Сондай-ақ, әкім бұл бастаманың тек әкімдік пен коммуналдық қызметтердің міндеті емес екенін, әр тұрғын өз ауласын таза ұстауға үлес қосуы қажет екенін баса айтты.

Өңірде тазалық пен көркейту шаралары жыл бойына жалғасады. Ал ең белсенді тұрғындар арнайы марапатталатын болады.