Air India اۋە كومپانياسىنىڭ لوندونعا باعىت العان جولدا اپاتقا ۇشىراعان Boeing 787-8 Dreamliner ۇشاعىندا ءبىر وتباسى تۇگەل قازا تاپتى، دەپ حابارلايدى bairaqmedia.kz.
ەرلى-زايىپتى دارىگەرلەر پراتيك دجوشي مەن كومي ۆياس جانە ولاردىڭ ءۇش بالاسى شەتەلدە جاڭا ءومىر باستاۋ ءۇشىن لوندونعا باعىت العان ەدى. الايدا ءبىر وتباسى مىنگەن ۇشاق احمادابادتان ۇشقاننان كەيىن نەبارى 32 سەكۋندتان سوڭ اپاتقا ۇشىرادى. وتباسىنىڭ ۇشاقتا تۇسكەن سوڭعى سۋرەتى جەلىدە تاراپ كەتتى.
M.economictimes.com باسىلىمىنىڭ جازۋىنشا، دارىگەر پراتيك دجوشي لوندوندا التى جىل تۇرىپ، وندا مانسابىن قالىپتاستىرىپ، وتباسى ءۇشىن جارقىن بولاشاققا جاعداي جاساعان. ال ونىڭ جۇبايى، دارىگەر كومي ۆياس — ۋدايپۋر قالاسىنداعى بەدەلدى Pacific اۋرۋحاناسىندا قىزمەت ەتكەن قۇرمەتتى دارىگەر. كومي ۆياس ساپارعا شىعاردا ەكى كۇن بۇرىن عانا جۇمىسىنان شىعىپ، كۇيەۋىنىڭ جانىنا، لوندونعا كوشىپ، جاڭا ءومىر باستاماق ەدى. ولاردىڭ بالالارى — بەس جاستاعى ەگىز ۇلدارى ناكۋل مەن پراديۋت جانە سەگىز جاستاعى قىزدارى ميراييا دا ساپار الدىندا الاڭسىز ەدى. الايدا جانتۇرشىگەرلىك ۇشاق اپاتى ءبىر وتباسى مۇشەلەرىنىڭ ءومىرىن قيدى.
مارقۇم دارىگەرلەردىڭ كورشىلەرى مەن دوستارى ەرلى-زايىپتىنى تەك كاسىبيلىگى ءۇشىن عانا ەمەس، سونداي-اق ولاردىڭ مەيىرىمدىلىگى مەن زاماناۋي كوزقاراستارى ءۇشىن دە ەرەكشە قۇرمەتتەگەن. وتباسىعا جاقىن دوسى "بۇكىل قالا قايعى جۇتىپ وتىر. جۇرەكتەرى جىلى، ارمانشىل جۇپ بالالارىنا ەڭ جاقسىنى بەرۋگە تىرىساتىن” دەدى News18 باسىلىمىنا بەرگەن سۇحباتىندا.
تاعى وقىڭىز: «ەسىمدى جيعاندا اينالامدا مايىتتەر جاتتى»: 242 جولاۋشىسى بار ۇشاق اپاتىنان ءبىر ادام عانا ءتىرى قالدى
اپاتقا ۇشىنراعان Dreamliner ۇشاعىندا تۇسكەن سۋرەتتەن وزدەرىن نە كۇتىپ تۇرعانىنان بەيحابار ەرلى-زايىپتى مەن بالالاردىڭ كۇلىمدەپ وتىرعانىن كورۋگە بولادى.
اۆياسيا ساراپشىلارىنىڭ ايتۋىنشا، Air India اۋە كومپانياسىنىڭ AI-171 رەيسى اۋەگە كوتەرىلگەن سوڭ بار بولعانى 32 سەكۋند ۇشىپ ۇلگەرىپ، سودان كەيىن باقىلاۋدان شىعىپ، بيىكتىگىن جوعالتا باستاعان. ساعات 13:38-دە احمادابادتاعى مەگاني ناگار ماڭىندا قۇلاعان. كۋاگەرلەر ۇشاق اۋەگە ارەڭ كوتەرىلگەنىن بايقاعان. العاشقى مالىمەتتەرگە سەنسەك، قوزعالتقىشتار قاجەتتى تارتىلىس كۇشىن الا الماعان.
بۇل ۇشاقتا 230 جولاۋشى مەن 12 ەكيپاج مۇشەسى بولعان.
بيلىك اپاتتىڭ سەبەپتەرىن زەرتتەۋدى جالعاستىرىپ جاتىر. الايدا ۇشاقتاعى سوڭعى سەلفي ءبۇتىن حالىقتىڭ ورنى تولماس قاسىرەتىنىڭ سيمۆولىنا اينالدى.
