لوندونعا باعىت العان Air India اۋە كومپانياسىنىڭ Boeing 787-8 Dreamliner ۇشاعى تۇرعىن اۋدانعا قۇلاپ، اۋىر اپاتقا ۇشىرادى. بورتتا بولعان 242 ادامنىڭ ءبارى كوز جۇمدى دەپ حابارلانعانىمەن، ءبىر جولاۋشىنىڭ امان قالعانى بەلگىلى بولدى، دەپ حابارلايدى bairaqmedia.kz. 

جەرگىلىكتى پوليسيانىڭ مالىمەتىنشە، ۇشاق قۇلاعان ۇيلەردىڭ تۇرعىندارى اراسىندا دا قۇرباندار بار.

ۇشاقتىڭ اپات سيگنالىن اۋەگە كوتەرىلگەننەن كەيىن بىردەن جىبەرگەن. بورتتا 12 ەكيپاج مۇشەسى جانە 230 جولاۋشى بولعان — ولاردىڭ 169-ى ءۇندىستان ازاماتى، 53ء-ى ۇلىبريتانيادان، 7-ەۋى پورتۋگاليادان جانە 1ء-ى كانادادان.

Hindustan Times باسىلىمىنىڭ جازۋىنشا، ۇشاقتا بولعان ۇلىبريتانيا ازاماتى – 40 جاستاعى رامەش ۆيشۆاكۋمار پوليسيا قىزمەتكەرلەرى قۇتقارعان جالعىز ادام رەتىندە تىركەلىپ وتىر. احمەداباد پوليسياسى ونىڭ اپات ورنىنان ءتىرى شىعارىلعانىن راستادى. ءقازىر ول اۋرۋحانادا ەم قابىلداپ جاتىر.

«ۇشاق كوككە كوتەرىلگەننەن كەيىن 30 سەكۋند ىشىندە قاتتى دىبىس شىقتى. سول ساتتە ءبارى ءبىر ساتتە وزگەردى – ۇشاق قۇلادى. بارلىعى كوز الدىمدا تەز بولىپ كەتتى. ەسىمدى جيعان كەزدە اينالامدا مايىتتەر مەن ۇشاقتىڭ سىنىقتارى جاتتى. قاتتى قورقىپ كەتتىم، ورنىمنان تۇرىپ، جۇگىرە جونەلدىم. بىرەۋ مەنى ۇستاپ الىپ، جەدەل جاردەم كولىگىنە وتىرعىزىپ، اۋرۋحاناعا جەتكىزدى»، – دەپ ەسكە الادى امان قالعان رامەش ۆيشۆاكۋمار.

قازا تاپقان جولاۋشىلاردىڭ اراسىندا بۇرىنعى مينيستر دە بولعان بولۋى مۇمكىن. ءۇندىستان ۇكىمەتىنىڭ رەسمي وكىلدەرىنىڭ ايتۋىنشا، گۋدجارات شتاتىنىڭ بۇرىنعى باس ءمينيسترى ۆيدجاي رۋپاني ۇشاق اپاتىندا قازا تاپقان بولۋى ىقتيمال.

قۇتقارۋ جۇمىستارى ءالى جالعاسىپ جاتىر. توتەنشە جاعدايلار قىزمەتى اپات ورنىندا. تەرگەۋ باستالدى.