الماتى وبلىسىنىڭ ۇيعىر اۋدانىندا العاشقى وڭىرلىك Apricot Fest ورىك فەستيۆالى ءوتتى، دەپ حابارلايدى bairaqmedia.kz
فەستيۆالدىڭ ءدال وسى اۋداندا ءوتۋى زاڭدى قۇبىلىس. ۇيعىر اۋدانى بۇگىندە ەلىمىزدەگى ورىك ءوسىرۋدىڭ جەتەكشى ورتالىعى سانالادى. اۋدانداعى 4 095 گەكتار باقتىڭ 3 100 گەكتارىن ورىك باۋلارى الىپ جاتىر. جىل سايىن مۇندا 22 مىڭ تونناعا دەيىن ءونىم جينالىپ، ونىڭ 4 مىڭ تونناسى رەسەي، قىرعىزستان جانە وزبەكستان نارىعىنا ەكسپورتتالادى. قالعان بولىگى ىشكى نارىقتا سۇرانىسقا يە - ورىكتىڭ ءبىر كەلىسى 250-300 تەڭگە ارالىعىندا ساتىلادى.
فەستيۆال ءوڭىردىڭ جازعى تۋريزم كۇنتىزبەسىندەگى جارقىن وقيعاعا اينالىپ، فەرمەرلەر، قولونەرشىلەر، وڭدەۋ ونەركاسىبى وكىلدەرى، تۋريستەر مەن ينۆەستورلاردى ءبىر الاڭدا توعىستىردى.
فەستيۆالدىڭ رەسمي اشىلۋىنا وبلىس، اۋدان باسشىلىعى، كاسىپكەرلەر مەن قوعام وكىلدەرى قاتىستى.
Apricot Fest - ەكوتۋريزم مەن وڭىرلىك ەكونوميكانى دامىتۋدىڭ تاماشا مىسالى. بۇل - تابيعات پەن مادەنيەتتى، جەرگىلىكتى ءونىم مەن بىرەگەيلىكتى توعىستىراتىن الاڭ. باستاپقى كەزەڭىندە-اق جوبا شەتەلدىك كاسىپكەرلەردىڭ قىزىعۋشىلىعىن وياتىپ وتىر. قىرعىزستان مەن وزبەكستان كومپانيالارى فەستيۆال اياسىندا ءونىم جەتكىزۋ بويىنشا كەلىسىمدەر جاسادى6 - دەيدى الماتى وبلىستىق ءماسليحاتىنىڭ ءتوراعاسى قۋات بايعودجايەۆ.
ۇيعىر اۋدانىنىڭ اكىمى بوتا ەلەۋسىزوۆا ورىكتىڭ ءوڭىر ءۇشىن ەرەكشە سيمۆولدىق ءمانى بار دەدى.
ورىك - بۇل ءبىزدىڭ اۋداننىڭ تەك اۋىل شارۋاشىلىق ءونىمى عانا ەمەس، ەكونوميكامىزدىڭ، مادەنيەتىمىزدىڭ دە بەلگىسى. ءبىز Apricot Fest فەستيۆالىن جىل سايىنعى داستۇرگە اينالدىرىپ، وڭىرىمىزگە تۋريستەر اعىنىن ارتتىرعىمىز كەلەدى، - دەدى بوتا ەلەۋسىزوۆا.
فەستيۆال اياسىندا ءتۇرلى گاسترونوميالىق ايماقتار، جەرگىلىكتى ونىمدەر جارمەڭكەسى، ەتنو-شوۋلار مەن شەبەرلىك سىنىپتارى ۇيىمداستىرىلدى. بيىلعى فەستيۆالدە ورىك باۋلارى وقيعالىق ءتۋريزمنىڭ جاڭا نىساندارى رەتىندە دە كورسەتىلدى.
اۋىل جانداندى. كوپتەن كۇتكەن قوزعالىس، جاڭعىرۋ باستالدى. كەلۋشىلەر قىزىعۋشىلىقپەن تاماشالاپ، ءونىمنىڭ ءدامىن كورىپ جاتىر. بىزگە ءدال وسىنداي شارالار قاجەت ەدى، - دەدى جەرگىلىكتى تۇرعىن راۆيل انادۋللايەۆ.
الماتى وبلىسىنىڭ تۋريزم باسقارماسىنىڭ باسشىسى قۋانىشبەك ميرامبەك ۇلىنىڭ ايتۋىنشا، 2026 جىلدان باستاپ Apricot Fest فەستيۆالىن ءساۋىر ايىندا، ورىك باۋلارى گۇلدەنەتىن كەزەڭدە وتكىزۋ جوسپارلانىپ وتىر.
كوكتەم - ءوڭىرىمىزدىڭ ەڭ ادەمى كەزەڭى. ورىك گۇلدەگەندە باۋلار كوزدىڭ جاۋىن الادى. ءبىز ساۋىردەگى فەستيۆالگە تۋريستەر اعىنى ودان سايىن كوبەيەدى دەپ سەنەمىز، - دەدى ول.
العاشقى Apricot Fest فەستيۆالى تەك ءونىم مەرەكەسى عانا ەمەس، جاڭا تۋريستىك جانە ينۆەستيسيالىق باعىت قالىپتاستىرۋدىڭ باستاۋىنا اينالدى. ەندى ورىك - ەكسپورتتىق ءونىم عانا ەمەس، ءوڭىردىڭ سيمۆولىنا، قوناقجايلىعى مەن مۇمكىندىكتەرىنىڭ كورسەتكىشىنە اينالۋدا.
