قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ تاۋەلسىزدىك كۇنىمەن قۇتتىقتادى، دەپ حابارلايدى اقوردا.
قۇرمەتتى وتانداستار!
تاۋەلسىزدىك كۇنى قۇتتى بولسىن!
بۇل مەرەكەنىڭ ەلىمىز ءۇشىن ءمان-ماڭىزى ايرىقشا. وسى كۇنى حالقىمىز قازاقستاندى ەگەمەن ەل رەتىندە دامىتۋ جولىندا ەرىكتى ءارى تۇپكىلىكتى تاڭداۋ جاسادى.
تاۋەلسىزدىك بارىنەن قىمبات! ءبىز بابالار رۋحىنا تاعزىم ەتىپ، وسكەلەڭ ۇرپاق الدىنداعى تاريحي جاۋاپكەرشىلىكتى سەزىنە وتىرىپ، وسى ۇستانىمعا ادال بولامىز.
ازاماتتارىمىزدىڭ ىرىستى ىنتىماعىنىڭ، ءوزارا قولداۋىنىڭ جانە جاسامپاز ەڭبەگىنىڭ، سونداي-اق قوعامداعى تۇراقتىلىق پەن كەلىسىمنىڭ ارقاسىندا قازاقستان تاۋەلسىزدىكتى نىعايتۋ ىسىندە ەلەۋلى جەتىستىكتەرگە قول جەتكىزدى. ءقازىر بۇكىل الەم جىلدام وزگەرىپ جاتىر. ءتۇرلى سىناقتارمەن قاتار، تىڭ مۇمكىندىكتەرگە تولى جاڭا تاريحي ءداۋىر باستالدى.
مۇنداي جاعدايدا ءبىز جاس جانە وزىق ويلى ۇلت رەتىندە بولاشاققا زور ۇمىتپەن جانە نىق سەنىممەن قاراپ، بەرەكەلى بىرلىگىمىزدى ساقتاۋىمىز كەرەك. ەلىمىزدىڭ جاھاندىق دەڭگەيدەگى بەدەلى مەن باسەكەگە قابىلەتىن ارتتىرىپ، قازاقستاندى كوركەيگەن مەملەكەت رەتىندە دامىتۋ ءۇشىن ايانباي ەڭبەك ەتۋىمىز قاجەت.
ءقازىر جۇزەگە اسىرىلىپ جاتقان اۋقىمدى رەفورمالاردىڭ ناتيجەسىندە زور تابىسقا جەتەمىز دەپ سەنەمىن. جان-جاقتى جاڭعىرۋعا باعىتتالعان ستراتەگيالىق باعدارىمىزدان اۋىتقىماي، ادىلەتتى، كۇشتى، تازا، ءقاۋىپسىز قازاقستاندى قۇرامىز.
بارشاڭىزعا مول باقىت، باق-بەرەكە جانە تولاعاي تابىس تىلەيمىن!
قاستەرلى تاۋەلسىزدىگىمىز ماڭگى بولسىن! – دەگەن قۇتتىقتاۋىن جەتكىزدى مەملەكەت باسشىسى.
