قىزىلوردا وبلىسىندا 44 ملرد تەڭگەدەن استام سوماعا زاماناۋي سانيتارلىق-تەحنيكالىق ءونىمدى ءوندىرۋ جانە قۇراستىرۋ زاۋىتىن سالۋعا ارنالعان ينۆەستيسيالار تۋرالى كەلىسىم جاسالدى، دەپ حابارلايدى bairaqmedia.kz.

وعان ءبىر تاراپتان ونەركاسىپ جانە قۇرىلىس ءمينيسترى ەرسايىن ناعاسپايەۆ پەن قىزىلوردا وبلىسىنىڭ اكىمى نۇرلىبەك نالىبايەۆ، ەكىنشى تاراپتان يسپانيالىق Roca Group كومپانياسىنىڭ ەنشىلەس كاسىپورنى – «روكا قازاقستان» ج ش س باس ديرەكتورى دانيەل ەرناندەس قول قويدى.

جوبا قازاقستان رەسپۋبليكاسى پرەزيدەنتىنىڭ وڭدەۋشى ونەركاسىپكە ينۆەستيسيالار تارتۋ جانە يمپورتتى الماستىرۋ جونىندەگى ماقساتتارعا قول جەتكىزۋ ءۇشىن لوكاليزاسيالاۋدى ارتتىرۋ بويىنشا قويعان مىندەتتەرىنە سايكەس جۇزەگە اسىرىلۋدا.

زاۋىت كەراميكالىق سانيتارلىق ونىمدەردى، جۋىناتىن بولمەلەرگە ارنالعان جيھازداردى جانە وزگە دە بۇيىمداردى وندىرۋگە جانە قۇراستىرۋعا مامانداناتىن بولادى. قۇرىلىس جۇمىستارى 2026 جىلدىڭ ءبىرىنشى توقسانىندا باستالادى دەپ جوسپارلانۋدا. جوبا شەڭبەرىندە 300-گە جۋىق جاڭا تۇراقتى جۇمىس ورىندارىن اشۋ، سونداي-اق قازاقستاندىق مامانداردى وقىتۋ جانە بىلىكتىلىگىن ارتتىرۋ كوزدەلگەن.

كاسىپورىن ۇدەرىستەردى اۆتوماتتاندىرۋدىڭ جوعارى دەڭگەيى بار جانە ەكولوگيالىق قاۋىپسىزدىكتىڭ الەمدىك ستاندارتتارىنا سايكەس كەلەتىن سانيتارلىق-تەحنيكالىق ونىمدەردى شىعارۋ بويىنشا قازاقستانداعى العاشقى ءوندىرىس بولماق.

جوبالىق قۋاتتىلىعى جىلىنا 500 مىڭ بۇيىمدى قۇرايدى. شىعارىلاتىن ءونىمدى قازاقستاننىڭ ىشكى نارىعىنا جەتكىزۋ جانە ورتالىق ازيا ەلدەرىنە ەكسپورتتاۋ جوسپارلانۋدا. 

زاۋىتتى ىسكە قوسۋ قوسىلعان قۇنى جوعارى ءونىم ءوندىرىسىن ۇلعايتۋعا جانە قازاقستاننىڭ ەكسپورتتىق الەۋەتىن كەڭەيتۋگە مۇمكىندىك بەرەدى.

ايتا كەتۋ كەرەك، ينۆەستيسيالار تۋرالى كەلىسىم جاساسۋ جوسپارى پرەمەر-مينيستر ولجاس بەكتەنوۆ پەن Roca Group ديرەكتورلار كەڭەسىنىڭ ءتوراعاسى سانتياگو دە گومار روكتىڭ وسى جىلدىڭ ماۋسىم ايىنداعى كەزدەسۋى بارىسىندا تالقىلانعان بولاتىن. وسىلايشا، قۇجاتقا قول قويىلۋى جانە جۇمىستاردىڭ باستالۋى ەل ەكونوميكاسىنىڭ ينۆەستيسيالىق تارتىمدىلىعىن ارتتىرۋ جونىندەگى جۇيەلى شارالاردىڭ ناتيجەسىن جانە ينۆەستورلار سەنىمىنىڭ جوعارى دەڭگەيىن كورسەتەدى.

قۇجاتقا قول قويۋ بارىسىندا Roca Group وكىلدەرى قازاقستان ولار ءۇشىن ستراتەگيالىق ماڭىزدى نارىق بولىپ سانالاتىنىن اتاپ ءوتتى. قازاقستانداعى قولايلى ينۆەستيسيالىق احۋالعا وڭ باعا بەردى.

انىقتاما: Roca Group – 100 جىلدان استام تاريحى بار، سانتەحنيكالىق جابدىقتاردى ءوندىرۋ سالاسىنداعى الەمدىك كوشباسشىلاردىڭ ءبىرى. كومپانيا بۇكىل الەم بويىنشا 78 وندىرىستىك الاڭدى باسقارادى، وندا 20 مىڭنان استام قىزمەتكەر جۇمىس ىستەيدى. ونىمدەرى 170-تەن استام ەلگە تارايدى جانە جوعارى ساپالى، يننوۆاسيالىق شەشىمدەر مەن ەۋروپالىق ستاندارتتارعا سايكەس بولعانى ءۇشىن كەڭىنەن تانىمال.