پاۆلودار قالاسىندا ەركىن كۇرەستەن قازاقستاندىق بالۋان، وليمپيادا ويىندارىنىڭ قولا جۇلدەگەرى داۋلەت شابانبايعا قاتىستى قىلمىستىق ءىس بويىنشا سوت ۇكىمى شىقتى، دەپ حابارلايدى bairaqmedia.kz.
سپورتشىعا ۇلتتىق ۇلاننىڭ پاترۋل قىزمەتكەرلەرىنە كۇش قولداندى دەگەن ايىپ تاعىلعان. تەرگەۋ ماتەريالدارىنا سايكەس، قىركۇيەك ايىندا تۇسكەن شاعىمنان كەيىن داۋلەت شابانباي كەشكى ساعات 21:00 شاماسىندا ءدامحانا ماڭىندا پاترۋل قىزمەتكەرلەرى تاراپىنان توقتاتىلعان.
قىزمەتتىك تەكسەرىس دەرەگىنە سۇيەنسەك، ءتارتىپ ساقشىلارىنىڭ سۇراقتارى مەن ەسكەرتۋلەرىنە ول بالاعات سوزدەر ايتىپ، ءبىر قىزمەتكەردى يتەرگەن. سونىمەن قاتار پاترۋل باسشىسىنىڭ يىعىنان تەۋىپ، بەتىنە سوققى جاساعانى، ال تاعى ءبىر اسكەري قىزمەتكەردىڭ كوزىنەن جاراقاتتاعانى ايتىلدى. وقيعا ورنىنا قوسىمشا جاساق شاقىرىلىپ، تەك سودان كەيىن عانا سپورتشى جەرگە جاتقىزىلىپ، قولىنا كىسەن سالىنعان.
سوت پروسەسى بارىسىندا مەملەكەتتىك ايىپتاۋشى داۋلەت شابانبايدى ءتورت جىلعا باس بوستاندىعىنان ايىرۋدى سۇرادى. ايىپتالۋشى ءوز كىناسىن مويىنداعانىمەن، جارىسسوزگە قاتىسۋدان باس تارتتى.
ءسوز سوڭىندا ول جابىرلەنۋشىلەردەن كەشىرىم سۇرادى.
تەك كەشىرىم سۇراعىم كەلەدى. جىگىتتەر، رەنجىمەڭىزدەر، – دەپ قىسقا عانا پىكىر ءبىلدىردى.
سوت شەشىمىمەن وليمپيادا ويىندارىنىڭ قولا جۇلدەگەرى داۋلەت شابانباي كىنالى دەپ تانىلدى. وعان ورتاشا قاۋىپسىزدىك دەڭگەيىندەگى تۇزەۋ مەكەمەسىندە جازاسىن وتەۋمەن ءۇش جىلعا باس بوستاندىعىنان ايىرۋ جازاسى تاعايىندالدى.
