سقو تايىنشا اۋدانىندا گاز تاسيتىن كولىك جارىلىپ، 8 ادامدى كۇيىك شالعان، دەپ حابارلايدى Bairaqmedia.kz.

25 ماۋسىمدا سقو تجد «101» كەزەكشى قىزمەتىنىڭ پۋلتىنە سولتۇستىك قازاقستان وبلىسى تايىنشا اۋدانى يليچيەۆكا اۋىلىنداعى «تايىنشا ماي» ج ش س اۋماعىندا سۇيىتىلعان گازدى تاسىمالداعان اۆتوكولىكتىڭ ورتەنگەنى تۋرالى حابارلاما كەلىپ ءتۇستى.

الدىن الا اقپارات بويىنشا جانارماي قۇيۋ كەزىندە گازگولدەردىڭ شلانگىسى ءۇزىلىپ، گاز تاسىعىش ماشينا، كەيىنەن جەراستى رەزەرۆۋار تىرەۋىش ارماتۋراسى جاندى.

وقيعا ورنىنا سولتۇستىك قازاقستان وبلىسى تجد كۇشتەرى مەن قۇرالدارى، سونداي-اق اقمولا وبلىسىنان قۇتقارۋشىلار جەدەل كەلدى. كۇش-جىگەردى ۇيلەستىرۋ ءۇشىن ءوڭىرارالىق ءوزارا ءىس-قيمىل جوسپارى ىسكە قوسىلدى.

وقيعا سالدارىنان 8 ادام ءتۇرلى دارەجەدەگى كۇيىك الىپ، كوكشەتاۋ قالاسىنىڭ وبلىستىق اۋرۋحاناسىنا جەتكىزىلدى. دارىگەرلەردىڭ قاراۋىنان كەيىن ءبىر ادام ۇيىنە جىبەرىلدى. قۇتقارۋشىلاردىڭ جەدەل، ۇيلەسىمدى جانە كاسىبي ءىس-قيمىلدارىنىڭ ارقاسىندا 50 شارشى مەتر الاڭدا ءورت ساعات 20:57-دە تولىعىمەن ءسوندىرىلدى، - دەلىنگەن حابارلامادا.

ءورتتى سوندىرۋگە جەكە قۇرامنان 80 ادام جانە 20 تەحنيكا، ونىڭ ىشىندە سولتۇستىك قازاقستان جانە اقمولا وبلىستارىنىڭ تجد، سونداي-اق تايىنشا اۋداندىق شارۋاشىلىق جۇرگىزۋ وبەكتىلەرىنىڭ ءورت ءسوندىرۋ بەكەتتەرى مەن مەملەكەتتىك ەمەس ورتكە قارسى قىزمەت بولىمشەلەرى جۇمىلدىرىلدى.

ءورتتىڭ سەبەپتەرى انىقتالىپ جاتىر. وقيعا فاكتىسى بويىنشا سقو تجد سوتقا دەيىنگى تەرگەۋ جۇرگىزىلىپ جاتىر.