Respublica پارتياسىنىڭ تەڭ ءتوراعاسى رەتىندەگى ميسسياسىن اياقتاعان رۋسلان بەردەنوۆ مالىمدەمە جاسادى، دەپ حابارلايدى bairaqmedia.kz
قاستاندىق قۇربانى بولا جازداعان شەنەۋنىكتىڭ ايتۋىنشا، بۇل شەشىمدى ءوزى سانالى تۇردە قابىلداعان. بۇعان بىرنەشە سەبەپ بار ەكەن.
قۇرمەتتى ارىپتەستەر، ءقادىرلى سەرىكتەستەر! مەن Respublica پارتياسىنىڭ تەڭ ءتوراعاسى رەتىندەگى ميسسيامدى اياقتاۋ جونىندە شەشىم قابىلداعانىمدى حابارلايمىن. بۇل شەشىم سانالى تۇردە جانە وزىمە قاتىستى ءبىرقاتار وبەكتيۆتى سەبەپتەرگە بايلانىستى قابىلداندى. بىرىنشىدەن، بەلگىلى بولعانداي، قازىرگى ۋاقىتتا مەن شىمكەنت قالاسى اكىمىنىڭ ورىنباسارى قىزمەتىن اتقارىپ كەلەمىن. قولدانىستاعى زاڭناما تالاپتارىنا سايكەس، مەملەكەتتىك قىزمەتتى ساياسي پارتياداعى جەتەكشىلىك قىزمەتپەن قاتار الىپ جۇرۋگە جول بەرىلمەيدى. مەن زاڭ تالاپتارىن قۇرمەتتەيمىن جانە ونى قاتاڭ ساقتايمىن. ەكىنشىدەن، پارتيانىڭ ىشكى قاعيداتتارىنا سايكەس، پارتيا مۇشەلەرى مەملەكەتتىك ورگانداردا لاۋازىمدى قىزمەت اتقارا المايدى. ءبىز ساياسي ۇدەرىستەرگە قاتىسۋ پارتيا ىشىندەگى بيلىك قۇرىلىمىمەن ارالاسپاۋى ءتيىس دەپ سانايمىز. ۇشىنشىدەن، قازىرگى تاڭدا ءوز دەنساۋلىعىمدى قالپىنا كەلتىرۋگە باسا نازار اۋدارىپ ءجۇرمىن. مەن ءاردايىم جۇمىسىما جوعارى جاۋاپكەرشىلىكپەن قاراپ كەلدىم، بۇدان كەيىن دە مەملەكەتتىك قىزمەتتەگى لاۋازىمىمدى ءوز دەڭگەيىندە اتقارۋىم كەرەك. سوندىقتان دا ءدال ءقازىر ءوزىمدى جاقسى سەزىنۋ ءۇشىن كۇش-قۋاتىمدى سوعان سالۋدامىن، - دەپ جازدى رۋسلان بەردەنوۆ.
ايتا كەتسەك، 21 ءساۋىر كۇنى شەنەۋنىك اكىمدىك عيماراتىنان شىققان ساتتە بەردەنوۆتىڭ بۇرىنعى قاراماعىنداعى قىزمەتكەرى بەس رەت وق اتقان. وسى شابۋىلعا قاتىستى تەرگەۋدىڭ اياقتالعانى دا بۇگىن ءمالىم بولدى.
