قازاقستاندىق اكتەر ساننۇرجان سۇلەيمەن اقش-تا جول اپاتىنا ۇشىراعان امەريكالىق جۇرگىزۋشىنى قۇتقارىپ قالدى، دەپ حابارلايدى Bairaqmedia.kz Kazinform-عا سىلتەمە جاساپ.

اقپاراتتىق پورتالدىڭ مالىمەتىنشە، وقيعا كەزىندە ونىڭ قاسىندا رەجيسسەر ءارى پروديۋسەر ەركەن يالگاشيەۆ، دىبىس رەجيسسەرى دۋمان جانە اكتريسا ايدانا ساحاري دا بولعان. وقيعا لوس-اندجەلەس ماڭىندا بولعان. قازاقستاننىڭ كينو تۇسىرەتىن توبى جول-كولىك وقيعاسىنىڭ بولعانىن كورگەن.

امەريكالىق جۇرگىزۋشى كولىكتى باسقارا الماي، ۇلكەن جىلدامدىقپەن جول جيەگىنەن شىعىپ كەتىپ، ورمان ىشىندەگى تەرەڭ جارعا قۇلاپ، اعاشتارعا سوعىلعان سوڭ، كولىگى ورتەنىپ كەتكەن.

ەركەن يالگاشيەۆ بىردەن 911 قۇتقارۋ قىزمەتىنە قوڭىراۋ شالعان. ال ساننۇرجان ەش ويلانباستان كولىككە قاراي جۇگىرىپ بارىپ، جانىپ جاتقان كولىكتىڭ ىشىنەن جۇرگىزۋشىنى الىپ شىققان. ول بۇل ارەكەتىمەن ءوز ءومىرىن قاتەرگە تىكتى، سەبەبى كولىك كەز كەلگەن ساتتە جارىلىپ كەتۋى مۇمكىن ەدى. اكتەردىڭ ەرلىگىنىڭ ارقاسىندا ەر ادام امان قالدى.

سالماعى اۋىر جۇرگىزۋشىنى 15 مەترلىك تەرەڭ جاردان شىعارۋ ءۇشىن ساننۇرجان، ەركەن، دۋمان جانە ەكى مەكسيكالىق ازاماتتىڭ كومەگى قاجەت بولدى.

كەيىن وقيعا ورنىنا جەدەل جاردەم قىزمەتى كەلىپ، زارداپ شەككەن ادامعا مەديسينالىق كومەك كورسەتتى. ول جەڭىل جاراقاتتار العانىمەن، دەنەسىنىڭ ءبىراز بولىگىن اۋىر كۇيىك شالعان.

ايتا كەتسەك، 27 جاستاعى ساننۇرجان سۇلەيمەن قازاقستاندىق كورەرمەندەرگە اقان ساتايەۆتىڭ «رايونى» فيلمىندەگى ءرولى ارقىلى تانىمال. سونداي-اق ول «رەكەتير-2» جانە «بيزنەسمەنى» فيلمدەرىندە ەپيزودتىق رولدەردە ويناعان.