الماتىنىڭ قاق ورتاسىندا ورنالاسقان، جارتى عاسىر تاريحى بار يبراگيم نۇسىپبايەۆ اتىنداعى №4 مەكتەپ-ينتەرناتتىڭ وقۋشىلارى ادام توزگىسىز جاعدايدا ءبىلىم الىپ جاتىر. مەكتەپ جيىرما جىلدان استام ۋاقىت جوندەۋ كورمەي، ابدەن توزىعى جەتكەن. بۇل تۋرالى دەپۋتات دانيار قاسقاراۋوۆ پرەمەر-مينيستر ولجاس بەكتەنوۆقا جولداعان دەپۋتاتتىق ساۋالىندا ايتتى، دەپ حابارلايدى Bairaqmedia.kz. 

ايتۋىنشا، الماتى قالاسىنداعى العاشقى قازاق مەكتەبى دەۋگە بولاتىن ءبىلىم وشاعى مالشىلاردىڭ دارىندى ۇل-قىزدارىنىڭ، الەۋمەتتىك جاعدايى تومەن، كوپبالالى وتباسىلاردان شىققان جانە جەتىم بالالاردىڭ ۇلكەن قالادا ساپالى ءبىلىم الۋى ءۇشىن ارنايى سالىنعان بولاتىن.  

اتالمىش مەكتەپ قابىرعاسىنان ەلىمىزگە بەلگىلى كوپتەگەن تۇلعالار شىققان. ولاردىڭ قاتارىندا بەلگىلى جازۋشى سماعۇل ەلۋباي، ايگىلى كومپوزيتور اسەت بەيسەۋوۆ، قازاقتىڭ تۇڭعىش كاسىبي رەجيسسەرى اسقار توقپانوۆ سىندى ەلگە ەڭبەگى سىڭگەن، ءار سالانىڭ مايتالمانىنا اينالعان  بىرەگەي قايراتكەرلەر بار. ءوزىم دە وسى مەكتەپتەن ءبىلىم الىپ، قالىپتاستىم، دەدى دەپۋتات.

دەگەنمەن، ەلىمىزدەگى ەڭ ءىرى مەگاپوليس – الماتىنىڭ قاق ورتاسىندا ورنالاسقان بۇل ءبىلىم ورداسىنىڭ قازىرگى جاعدايى وتە مۇشكىل. مەكتەپ جيىرما جىلدان استام جوندەۋ كورمەي ابدەن توزىعى جەتكەن. جالپى 350 وقۋشىعا ارنالعان مەكتەپتە بۇگىندە وقۋشى سانى ەكى ەسە قىسقارتىلىپ، 176 بالا ءبىلىم الىپ جاتىر. الايدا ولار سپورت زالدا ۇيىقتاپ، وقۋ سىنىبىندا تاماق ىشۋگە ءماجبۇر، – دەدى دانيار قاسقاراۋوۆ. 

دەپۋتات ۇسىنعان دەرەكتەرگە سايكەس، مەكتەپكە كۇردەلى جوندەۋ جۇرگىزۋ ءۇشىن 3 جىل بۇرىن بيۋدجەتتەن 503 ميلليون تەڭگە ءبولىنىپ، مەملەكەتتىك ساتىپ الۋ كونكۋرسىن «گرادسترويسەرۆيس» ج ش س ۇتىپ العان. جوسپار بويىنشا قۇرىلىس جۇمىستارى 4 ايدىڭ ىشىندە اياقتالۋعا ءتيىس ەدى. ءبىراق جاۋاپسىز مەردىگەر ءوز مىندەتتەرىن سول كۇيى ورىنداماعان.  

سوندا وسىعان جاۋاپتى قۇزىرلى مەكەمەلەر قايدا قاراپ وتىرعان دەگەن زاڭدى ساۋال تۋىندايدى؟! ءححى عاسىردا، الماتى قالاسىنىڭ ءدال ورتاسىنداعى مەكتەپتە وقۋشىلاردىڭ وسىنداي ادام توزگىسىز جاعدايعا تۇسىرىلگەنىن قالاي تۇسىنۋگە بولادى؟! – دەپ كۇيىندى دەپۋتات. 

ايتۋىنشا، ءقازىر وسى ءبىلىم ورداسىن الماتىدان قونايەۆ قالاسىنا كوشىرۋ ماسەلەسى كوتەرىلىپ جاتىر ەكەن. ءبىراق بۇل شەشىمگە وسى ءبىلىم وشاعىنىڭ تۇلەكتەرى، مۇعالىمدەر مەن وقۋشىلاردىڭ اتا-انالارى الاڭداپ، كوشىرۋگە تۇبەگەيلى قارسى بولىپ وتىر.  

سونداي-اق دەپۋتات حالىقتى الماتىنىڭ ورتاسىندا ورنالاسقان مەكتەپتىڭ جەرىن الىپ قويا ما دەگەن كۇمان الاڭداتىپ وتىرعانىن جەتكىزدى.  

وسىنى ەسكەرىپ، ۇكىمەتكە تومەندەگى شارالاردى قابىلداۋدى سۇرايمىن.

بىرىنشىدەن، مەملەكەتتىڭ ميلليوندارىن جەلگە ۇشىرىپ، قانشاما بالانى سارساڭعا تۇسىرگەن، مەكتەپتى قيراندىعا اينالدىرعان كومپانيا باسشىلارىن، باسقا دا جاۋاپتى مەكەمەلەردى جان-جاقتى تەكسەرىپ، ءتيىستى جاۋاپقا تارتۋ قاجەت.  

ەكىنشىدەن، تەز ارادا اتالعان مەكتەپتى تولىق كۇردەلى جوندەۋدەن وتكىزىپ، جاڭا وقۋ جىلىنا پايدالانۋعا بەرۋ كەرەك.  

ۇشىنشىدەن، مەكتەپتى باسقا جەرگە كوشىرۋ بويىنشا باستامالارعا تۇبەگەيلى تىيىم سالۋ قاجەت، – دەدى دەپۋتات.