وزبەكستان سىرتقى ىستەر مينيسترلىگى رەسەي تاراپىنىڭ ميگرانتتارعا قاتىستى ارەكەتتەرىنە بايلانىستى رەسمي قارسىلىق ءبىلدىرىپ، ديپلوماتيالىق نوتا جولدادى، دەپ جازدى Aniq.uz.
مينيسترلىكتىڭ مالىمەتىنشە، رەسەي اۋماعىندا كەي جاعدايلاردا وزبەكستان ازاماتتارىنا رۇقساتسىز تەكسەرۋلەر جۇرگىزىلىپ، دورەكى جانە قۇرمەتسىز قارىم-قاتىناس جاسالعان. مۇنداي ارەكەتتەر ەكى ەل اراسىنداعى دوستىق قاتىناستارعا قايشى كەلەتىنى اتاپ ءوتىلىپ، ولاردىڭ الدىن الۋ ءۇشىن ناقتى شارالار قابىلداۋ قاجەتتىگى كورسەتىلدى.
وزبەكستان ءسىم بارلىق ازاماتتاردىڭ ار-نامىسى مەن قادىر-قاسيەتى قورعالۋى ءتيىس ەكەنىن، سونداي-اق ادام قۇقىقتارى مەن حالىقارالىق قۇقىق نورمالارىنىڭ ساقتالۋى قاجەت ەكەنىن قاتاڭ مالىمدەدى.
ماسكەۋدەگى وزبەكستان ەلشىلىگى رەسەي سىرتقى ىستەر مينيسترلىگىنە جولداعان نوتادا مىناداي ماسەلەلەر كورسەتىلدى:
— رەسەي اۋماعىنداعى كەيبىر قۇقىق قورعاۋ ورگاندارى وكىلدەرى تاراپىنان كۇش قولدانۋ جاعدايلارى؛
— مۇنداي ارەكەتتەردىڭ ادام قۇقىقتارىنىڭ ورەسكەل بۇزىلۋى ەكەندىگى؛
— ورىن العان وقيعالارعا قۇقىقتىق باعا بەرۋ قاجەتتىگى.
وزبەكستان رەسپۋبليكاسىنىڭ سىرتقى ىستەر مينيسترلىگى بۇل ماسەلەنى تۇراقتى باقىلاۋدا ۇستايتىنىن جانە قاجەت بولعان جاعدايدا قوسىمشا شارالار قابىلدايتىنىن جەتكىزدى.
ايتا كەتەيىك، بۇعان دەيىن الەۋمەتتىك جەلىلەر مەن باق-تا رەسەيدە تاكسيست بوپ جۇمىس ىستەپ جۇرگەن وزبەكستان ازاماتىنا جەرگىلىكتى تۇرعىنداردىڭ ءبىرى اۋزىنا كەلگەنىن ايتىپ، «سەندەر — ورىستاردىڭ قۇلىسىڭدار» دەگەنىن كورسەتەتىن اقپارات پەن بەينەجازبا تاراعان بولاتىن.
