قازاقستاندا ءىرى ساۋدا، ويىن-ساۋىق ورتالىقتارىندا ورتتەن زارداپ شەككەندەرگە كەلتىرىلگەن زالالدىڭ ورنىن تولتىرۋ كوزدەلىپ وتىر. بۇل تۋرالى قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ورىنباسارى ماريا حادجييەۆا مالىمدەدى،  دەپ حابارلايدى Bairaqmedia.kz.

ونىڭ ايتۋىنشا، بيىل ادامدار كوپ جينالاتىن وبەكتىلەر يەلەرىنە جاۋاپكەرشىلىكتىڭ جۇكتەلگەن ساقتاندىرۋىن ەنگىزۋ جوسپاردا بار. سونىمەن قاتار اپاتتى تاۋەكەلدەردەن ساقتاندىرۋ جۇيەسىن كوپ دەڭگەيلى ەتۋ جانە بىرنەشە كوزدەن وتەماقى تولەۋ كوزدەلگەن. 

ساۋدا ورتالىقتارىندا جانە ادامدار جاپپاي جينالاتىن اۋدانى 2 مىڭ شارشى مەتردەن اساتىن ءىرى وبەكتىلەرىندە ورتتەن زارداپ شەككەندەرگە زالالدى وتەۋ قامتاماسىز ەتىلمەك. زاڭ جوباسى ق ر پارلامەنتىنىڭ قاراۋىندا.

ماريا حادجييەۆا اتاپ وتكەندەي،  ەلىمىزدىڭ اۋماعىندا ءتۇرلى تابيعي اپاتتار ءقاۋپى بار. بۇل – جەر سىلكىنىسى، سۋ تاسقىنى، ورمان ورتتەرى، قۇرعاقشىلىق جانە داۋىل. 

«الماتىداعى جەر سىلكىنىسى مەن ەلىمىزدىڭ سولتۇستىگى جانە باتىسىندا سۋ تاسقىنىنان زارداپ شەككەن 224 ەلدى مەكەن اپاتتار ءقاۋپى بار ايماقتاردا ازاماتتاردىڭ مۇلكىن قورعاۋدىڭ قوسىمشا جۇيەسىن قۇرۋ قاجەتتىلىگىن راستادى. بۇگىنگى تاڭدا حالىقتى وسىنداي ساقتاندىرۋمەن قامتۋ كورسەتكىشى وتە تومەن – ەل بويىنشا شامامەن 3،2%-دى قۇرايدى. حالىقارالىق تاجىريبە كورسەتكەندەي، اپاتتى ساقتاندىرۋدىڭ ءتيىمدى جۇيەلەرى ءاردايىم كوپ دەڭگەيلى بولىپ تابىلادى جانە بىرنەشە كوزدەردەن تولەمدەردى قامتيدى. سوندىقتان ءبىز مەملەكەتتىك-جەكەشەلىك ارىپتەستىكتىڭ ءتۇرلى نۇسقاسىن، سونىڭ ىشىندە بيۋدجەت شىعىندارىن، ساقتاندىرۋدى جانە سىرتقى قارجىلاندىرۋدى تارتۋدى قاراستىرامىز»، – دەدى ماريا حادجييەۆا.

اگەنتتىك قابىلدانىپ جاتقان شارالار ازاماتتاردىڭ الەۋمەتتىك قورعالۋىن قامتاماسىز ەتەدى جانە ساقتاندىرۋ مادەنيەتىن دامىتۋعا ىقپال ەتەدى دەپ سانايدى.