2025 جىلعى ساۋىردە ۇقك پروكۋراتۋرا ورگاندارىنىڭ ۇيلەستىرۋىمەن استانا قالاسى، اباي، اقتوبە جانە تۇركىستان وبلىستارىنداعى ءدىني راديكالداردىڭ ارەكەتىنىڭ جولىن كەستى،  دەپ حابارلايدى Bairaqmedia.kz.

اقپاراتقا سايكەس، الەۋمەتتىك جەلىلەر ارقىلى تەرروريزمدى ناسيحاتتاپ، ءدىني الاۋىزدىقتى قوزدىردى  دەگەن كۇدىكپەن 4 قازاقستاندىق ۇستالعان. ولاردىڭ بىرەۋى بۇرىن سوتتىلى بولعان.

تۇرعىن ۇيلەرىن ءتىنتۋ بارىسىندا زاتتاي دالەلدەمەلەر الىندى. قىلمىستىق كودەكستىڭ 174 جانە 256-باپتارى بويىنشا سوتقا دەيىنگى تەرگەپ-تەكسەرۋلەر جۇرگىزىلىپ جاتىر، – دەلىنگەن حابارلامادا.

بۇدان بولەك، ۇقك بۇرىن تەرگەگەن قىلمىستىق ىستەر بويىنشا سوت اقتوبە، قاراعاندى جانە تۇركىستان وبلىستارىنىڭ 3 تۇرعىنىنا قاتىستى ايىپتاۋ ۇكىمدەرىن شىعاردى. سوتتالعاندار الەۋمەتتىك جەلىدە جانە اينالاسىندا تەرروريزم مەن ءدىني ەكسترەميزم يدەولوگياسىن تاراتقان.