ۇكىمەت قىزىلورداداعى وڭتۇستىك قازاندىعىنىڭ ءۇش بۋ قازاندىعىن رەكونسترۋكسيالاۋ جوباسىن جۇزەگە اسىرۋعا 2،5 ملرد تەڭگەدەن استام قارجى ءبولدى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى، دەپ حابارلايدى Bairaqmedia.kz.
اقپاراتقا سايكەس، قاراجات قىزىلوردا تۇرعىندارىن ورتالىقتاندىرىلعان جىلۋمەن جابدىقتاۋدى 3 كوزدەن: نەگىزگى جەو، وڭتۇستىك جانە اۆتونومدى قازاندىقتار ارقىلى قامتاماسىز ەتەتىن جالعىز كاسىپورىن «قىزىلوردا جىلۋ ەلەكتر ورتالىعى» مكك-عا باعىتتالادى.
ءقازىر وڭتۇستىك قازاندىقتىڭ نەگىزگى جابدىقتارى اپاتتى جاعدايدا جانە رەزەرۆتىك قۋاتسىز جۇمىس ىستەپ تۇر. ولاردى رەكونسترۋكسيالاۋ جوباسىن جۇزەگە اسىرۋ 2024 جىلى باستالعان، ۇكىمەت رەزەرۆىنەن 2،04 ملرد تەڭگە، وبلىستىق بيۋدجەتتەن 655 ملن تەڭگە بولىنگەن بولاتىن. اتالعان كەزەڭدە سۋدى حيميالىق تازارتۋ قوندىرعىلارىن اۋىستىرۋ، ەسكى قازاندىقتاردى بولشەكتەۋ، سونداي-اق جاڭا جابدىقتار جاساۋ ءۇشىن زاۋىتقا وتىنىمدەر بەرۋ بويىنشا جۇمىستار ورىندالدى.
جوبانىڭ اياقتالۋى الداعى جىلىتۋ ماۋسىمىنا دايىندالۋعا جانە قالانىڭ وڭتۇستىك بولىگى تۇرعىندارىن: 197 كوپپاتەرلى تۇرعىن ءۇي كەشەنىن، 73 الەۋمەتتىك جانە 69 شارۋاشىلىق نىساندى تۇراقتى جىلۋمەن قامتاماسىز ەتۋگە مۇمكىندىك بەرەدى.
«ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى اياسىندا وڭىردە جىلۋ جەلىلەرىن جوندەۋ بويىنشا 4 جوبانى ىسكە اسىرۋ كوزدەلىپ وتىر.
